Հաիթիում հանցախմբերը գրոհով վերցրել են բանտը և ազատ արձակել 4 000 բանտարկյալի

Զինված հանցախմբերը գրոհով վերցրել են Հաիթի կղզեպետության մայրաքաղաքի բանտը եւ ազատ արձակել մոտ 4 000 բանտարկյալի, գրում է BBC-ն։

Ազգային բանտի դեմ գրոհը տեղի է ունեցել շաբաթ երեկոյան այն բանից երկու օր հետո, երբ Հաիթիի վարչապետը մեկնել է Քենիա՝ պայմանավորվելու Հաիթիում միջազգային զորակազմի տեղակայման շուրջ՝ ավազակության դեմ պայքարի համար, իսկ հանցախմբերից մեկի պարագլուխը՝ Բարբեքյու մականունով, վարչապետին պատերազմ է հայտարարել։

Կիրակի, երբ հայտնի է դարձել բանտի դեմ գրոհի մասին, այնտեղ են գնացել միջազգային գործակալությունների թղթակիցներ։ AFP գործակալությունը տեղեկացրել է, որ բանտի դարպասները բաց են եղել, և դրանց կողքին ընկած է եղել ավելի քան տասը դիակ։ 

Հաիթիի իշխանությունները հայտարարել են, որ ոստիկանությունը փորձել է հետ մղել գրոհը նաև մեկ այլ բանտում՝ Կրուա դե Բուկում։ Չի տեղեկացվել, թե քանի մարդ է փախել բանտից, իսկ առաջինում եղել է 3 800 մարդ, բանտախցերում մնացել է նրանցից 99-ը, տեղեկացրել է Reuters-ը։ Նրանք դուրս չեն եկել, որ չհայտնվեն փամփուշտների տակ։ Նրանց մեջ են նախկին կոլումբիացի զինվորները, որոնք 2021 թվականի հուլիսին մեղադրվել են Հաիթիի նախագահ Ժովենել Մոիզի սպանության համար։

Այդ սպանությունից հետո Հաիթին՝ Ամերիկայի ամենաաղքատ երկիրը, վերջնականապես հայտնվեց անարխիայի և ավազակության մեջ։ Հանցախմբերը վերահսկում են մայրաքաղաք Պորտ-օ-Պրենսի 80 %-ը։ Անցած տարի 11 միլիոնանոց երկրում սպանվել է մոտ 8,5 հազար մարդ։