Իսրայելը կփոխի «Եվրատեսիլ 2024»-ի երգի տեքստը

Իսրայելը համաձայնել է փոխել իր «Եվրատեսիլ 2024» October Rain երգի բառերը, հայտնում է Jerusalem Post-ը։ Նշվում է, որ նախնական տարբերակը մերժվել է մրցույթի կազմկոմիտեի կողմից։ Խմբագրված տեքստը, ինչպես ընդգծվում է, մրցույթում այս երգի օգտագործման հնարավորություն կընձեռի։

«Իսրայելի հանրային հեռարձակման կորպորացիան (KAN) վերջին շաբաթների ընթացքում աշխատել է անհրաժեշտ քայլեր ձեռնարկելու համար, որպեսզի Իսրայելը կարողանա մասնակցել այս տարվա «Եվրատեսիլ» երգի մրցույթին», - հայտնել են ընկերությունից:

«Չնայած անհամաձայնությանը Եվրոպական հեռարձակողների միության դիրքորոշման հետ, որը փորձում էր որակազրկել Իսրայելի կողմից ներկայացված երգերը՝ պատճառաբանելով, որ դրանք քաղաքական բնույթ են կրում, KAN-ը հետևեց նախագահ Իսահակ Հերցոգի խորհրդին: Նա առաջարկեց կատարել անհրաժեշտ փոփոխություններ, որպեսզի Իսրայելը ներկայացված լինի եվրատեսիլյան բեմում»,- նշել է KAN-ը։

«Նախագահն ընդգծել է, որ հենց այս պահին, երբ մեր թշնամիները բոլոր հարթակներից ձգտում են բոյկոտել Իսրայել պետությանը, Իսրայելը պետք է հպարտությամբ և գլուխը բարձր բարձրացնի իր ձայնը և ծածանի իր դրոշը բոլոր միջազգային ֆորումներում՝ հատկապես այս տարի»,-հայտնել են կազմակերպությունից։