Հայիթիում հանցախմբերը հարձակվել են նախագահական պալատի վրա

Հայիթիի հանցախմբերը ուրբաթ երեկոյան լայնածավալ հարձակում են գործել Պորտ-օ-Պրենսի կենտրոնում գտնվող բազմաթիվ կառավարական շենքերի վրա, հաղորդում է ABC News-ը՝ վկայակոչելով մարտում ներգրավված իրավապահ մարմինների աղբյուրին:

Հարձակումը համակարգված է եղել և արագ, տարբեր խմբավորումներ միաժամանակ գրոհել են մի քանի կառավարական շենքեր, այդ թվում՝ նախագահական պալատը, ներքին գործերի նախարարությունը և Հայիթիի արևմտյան շրջանի ոստիկանության շտաբը, որը ներառում է Պորտ-օ-Պրենսը, ասել է աղբյուրը:

Նախնական տվյալներով՝ սպանվել է մոտ մեկ տասնյակ զինյալ։ Ոստիկանության զոհերի մասին տեղեկություններ դեռ չկան։

Նախագահական պալատը չի զբաղեցվել  2021 թվականի հուլիսին նախագահ Ժովենել Մոյզի սպանությունից հետո: 2010 թվականին տեղի ունեցած հզոր երկրաշարժը ավերել է համալիրի զգալի մասը՝ այն դարձնելով ամբողջովին անօգտագործելի։ Այնուամենայնիվ, պալատը շարունակում է մնալ Հայիթիի դաշնային կառավարման խորհրդանիշը և հսկվում է օրական 24 ժամ:

Ավելի վաղ Հայիթիի ավազակախմբերը ներխուժել էին բանտ և ազատել հազարավոր բանտարկյալների։ Ապա հաղորդվել է մայրաքաղաքի օդանավակայանը գրավելու փորձի մասին։ Երկրում արտակարգ դրություն է հայտարարվել։ Հանցավոր համայնքի առաջնորդ Ջիմի Շերիզիեն՝ «Բարբեքյու» մականունով, պահանջում է հեռացնել երկրի վարչապետ Արիել Հենրիին։