Վենեսուելայի նախագահը Զելենսկիին «պարտված ծաղրածու» է անվանել

«Ուկրաինայի նախագահ Վոլոդիմիր Զելենսկին, ով քննադատել է Հռոմի պապ Ֆրանցիսկոսին Ուկրաինայում խաղաղության կոչի համար, կարծես պարտված ծաղրածուի լինի»։ Այս մասին Venezolana de Television հեռուստաալիքի եթերում հայտարարել է Վենեսուելայի նախագահ Նիկոլաս Մադուրոն։

Նա Ուկրաինայի նախագահին համեմատել է Վենեսուելայի ընդդիմության նախկին առաջնորդ Խուան Գուայդոյի հետ՝ ընդգծելով, որ նրանք երկուսն էլ վնասում են իրենց ժողովրդին։ «Զելենսկին սկսում է վատ բաներ ասել, վիրավորել Հռոմի պապին։ Նա ինձ համար նույն ծաղրածուն է, նույնքան կոպիտ և պարտված, որքան Գուայդոն», - ասել է Մադուրոն:

Պետության ղեկավարը պաշտպանել է պոնտիֆիկոսի դիրքորոշումը՝ նշելով, որ Վենեսուելան համաձայն է, որ եկել է Ուկրաինայի հակամարտության խաղաղ բանակցությունների ժամանակը։

Ավելի վաղ Ֆրանցիսկոսը կոչ էր արել ուկրաինական հակամարտությունում պարտված կողմին բարձրացնել սպիտակ դրոշը և սկսել խաղաղ բանակցությունները։ Սակայն նա ուղղակիորեն չի նշել հակամարտության կողմերի անունները։

Զելենսկին մեկնաբանել է պոնտիֆիկոսի հայտարարությունը` այն անվանելով «վիրտուալ միջնորդություն»: Ուկրաինայի նախագահը շնորհակալություն է հայտնել յուրաքանչյուր ուկրաինացի հոգևորականի, ով զինվորների կողքին է առաջնագծում՝ նրանց աջակցելով աղոթքով, խոսքով և գործով։ «Ահա թե ինչ է եկեղեցին՝ մարդկանց հետ լինել: Եվ ոչ թե երկուսուկես հազար կիլոմետր հեռավորության վրա, ինչ-որ տեղ վիրտուալ միջնորդությամբ զբաղվել»,- ասել է Զելենսկին։