Փաշինյանը գտել է՝ «կրոնափոխ եղած» ՀՀԿ-ականների լավության տակից դուրս գալու ձևը

Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ ՀՀ Ազգային ժողովի նախկին պատգամավոր Նաիրի Սահակյանից և նրան փոխկապակցված անձից հօգուտ Հայաստանի Հանրապետության բռնագանձել՝ 3 անշարժ գույք, 1 տրանսպորտային միջոց, 1 իրավաբանական անձում մասնակցություն, Վահագնի թաղամասում գտնվող բնակելի տան ներկայիս շուկայական արժեքի 71 տոկոսը, 602 մլն 789 հազար դրամ, որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել, 371 մլն 783 հազար դրամ՝ որպես ապօրինի ծագում ունեցող գույքի օգտագործումից ստացված եկամտի մնացորդ:

2021 թվականի արտահերթ խորհրդարանական ընտրություններց հետո  մամուլը գրել էր, որ  Արագածոտնի մարզի երբեմնի տեր ու տնօրեն Սահակյան եղբայրները՝ նախկին մարզպետ Սարգիս Սահակյանը եւ «Հայդուկ» ՀԿ ղեկավար Նաիրի Սահակյանը, միացել են ՔՊ-ական մարզպետին ու ակտիվ աշխատում են ՏԻՄ-ում ՔՊ-ի թեկնածուների հաղթանակի համար։ Նրանք ԱԺ ընտրությունների ժամանակ «Պատիվ ունեմ» դաշինքի մարզային շտաբն էին ղեկավարում։ Սակայն, հետագայում փոշմանեցին և որոշեցին Թալինում Տավրոս Սափեյանին  աջակցել, քանի որ «իմ թշնամու թշնամին իմ բարեկամն է», իսկ Տավրոսի մրցակիցը ՀՀԿ-ական նախկին պատգամավոր, Թալինի նախկին քաղաքապետ Մնացական Մնացականյանն էր, որի նկատմամբ նրանք վաղեմի թշնամանք ունեն։ Սահակյաններն աջակցում էին նաեւ Աշտարակի ՔՊ թեկնածու Թովմաս Շահվերդյանին։ Նրանք կոնսոլիդացրել էին իրենց նախկին համայնքապետերին, նախկին քաղաքապետ Սարգիս Արամյանին եւ համակարգում էին ձայնահավաքը։

Ի՞նչ է ստացվում: Կամ համագործակցելիս և Սահակյանների օգնությամբ մարզում իշխանության գալուց ՔՊ-ականները և անձամբ Նիկոլ Փաշինյանը տեղյակ չէին, որ վերջիններս ապօրինի կերպով հարստացել են (չմոռանանք, անշուշտ, անմեղության կանխավարկածը), կամ փայլուն տեղյակ էին այդ մասին, սակայն ընտրություններում ձայն հավաքելը և մարզը իրենցով անելն այդ պահին շատ ավելի կարևոր էր և հենց այդ պատճառով էլ առանց խղճի խայթի համագործակցել են այսպես կոչված՝ նախկին թալանչիների հետ: Ինչևէ, մի բան ակնհայտ է, ահա այսպես է Նիկոլ Փաշինյանը դուրս գալիս իրեն և իր թիմակիցներին արված լավության տակից: