Օկուպացված Արցախում ՌԴ խաղաղապահները վաղաժամկետ քվեարկեցին նախագահական ընտրություններում

Ադրբեջանի կողմից օկուպացված Արցախում ռուս խաղաղապահները վաղաժամ քվեարկել են ՌԴ նախագահական ընտրություններում, հայտնել են ՌԴ ՊՆ-ից, գրում է ՏԱՍՍ-ը։

«Լեռնային Ղարաբաղում ռուսական խաղաղապահ զորախմբի հրամանատարական կազմը, զինվորական անձնակազմը և քաղաքացիական անձնակազմը մասնակցել են պետության ղեկավարի ընտրությունների վաղաժամկետ քվեարկությանը։ Ընտրական գործընթացը կազմակերպված է «Ռուսաստանի Դաշնության Նախագահի ընտրությունների վերաբերյալ» դաշնային օրենքին համապատասխան»,- ասվում է հաղորդագրության մեջ։

Գերատեսչությունից հայտնել են, որ ռուսական խաղաղապահ կոնտինգենտի անձնակազմի ռոտացիան ավարտվել է 2023 թվականի նոյեմբերին։ Նախարարությունը պարզաբանել է, որ ռուսական խաղաղապահ զորախումբը շարունակում է առաջադրանքներ իրականացնել Արցախում։

Պահպանվում է շարունակական փոխգործակցությունը Բաքվի հետ՝ ուղղված իբրև թե «խաղաղ բնակչության անվտանգության ապահովմանը և մարդասիրական իրավունքի պահպանմանը»։

ՌԴ Դաշնային խորհուրդը նախագահական ընտրությունները նշանակել է 2024 թվականի մարտի 17-ին։ ՌԴ Կենտրոնական ընտրական հանձնաժողովը որոշել է, որ քվեարկությունը կտևի երեք օր՝ մարտի 15-ին, 16-ին և 17-ին։ Այսպիսով, սա առաջին եռօրյա նախագահական ընտրություններն են լինելու Ռուսաստանի Դաշնությունում։