Աննախադեպ անկում և խաբված գյուղացիներ. ինչի՞ հասցրեց Փաշինյանի «գյուղատնտեսական հեղափոխությունը»

Վերլուծական 15 Մարտ, 2024 20:18

Աննախադեպ անկում և խաբված գյուղացիներ. ինչի՞ հասցրեց Փաշինյանի «գյուղատնտեսական հեղափոխությունը»

Գաղտնիք չէ, որ 2018 թվականի Թավշյա հեղափոխության օրերին Նիկոլ Փաշինյանին և ՔՊ-ականներին մեծ աջակցություն էին ցուցաբերում մարզերի և հատկապես գյուղաբնակ համայնքների բնակիչները: Այդ օրերին նրանք հասնում էին Երևան՝ հույս ունենալով, որ ապագան շատ ավելի լուսավոր և խոստումնալից կլինի: Փաշինյանն էլ իր հերթին հայտարարում էր, որ գյուղատնտեսության զարգացումը լինելու է իր առաջնահերթություններից մեկը: Սակայն, այն ինչ եղավ հետագայում, մեղմ ասած, չէր տեղավորվում այդ խոստումների տրամաբանության մեջ:

Նախորդ տարի տեղի ունեցած կառավարության նիստերից մեկում Նիկոլ Փաշինյանն ասաց, որ գյուղատնտեսության ոլորտը շարունակում է անկում ապրել։ Նա ավելացրեց, որ այս տարվա հունվար-սեպտեմբեր ամիսներին գյուղատնտեսական արտադրանքի 0,7 տոկոսի անկում ենք ունեցել: 2018 թվականի մայիսի 8-ին ՀՀ նորանշանակ վարչապետ Նիկոլ Փաշինյանը Հանրապետության հրապարակում հանդես եկավ ելույթով՝ խոստանալով, որ «Հայաստանում հեղափոխական տեմպերով պետք է զարգացնել գյուղատնտեսությունը: Նոր տեխնոլոգիաների կիրառումը պետք է լայնորեն տարածվի նաև գյուղատնտեսության ոլորտում՝ այս պարագայում էլ որպես ռազմավարական նպատակ ունենալով չմշակվող գյուղատնտեսական հողերի թվի շեշտակի նվազումը և, ի վերջո, այդպիսի հողերի գոյության բացառումը»:

Սակայն իրականում Հայաստանում գյուղատնտեսությունն անկում է ապրում։ Արդեն մի քանի տարի է՝ տնտեսական աճի պատկերում այս ոլորտի դիմաց տոկոսը 0-ից ցածր է։

Ինչ վերաբերում է «չմշակվող գյուղատնտեսական հողերի գոյության բացառմանը», նույն Նիկոլ Փաշինյանը 2021 թվականի ապրիլի 28-ին արձանագրեց, որ Հայաստանում վարելահողերի 50%-ից ավելին չի մշակվում, իսկ 74%-ը չի ոռոգվում։

«Հայաստանում ոռոգման ջուրը նույնքան հասանելի պետք է լինի, որքան էլեկտրական հոսանքն է տարածված և հասանելի»,- այս խոսքերի հեղինակը վարչապետի պաշտոնակատար Նիկոլ Փաշինյանն էր։ Խոստումը տվել է 2018թ․ մայիսի 8-ին Ազգային ժողովում, երբ փորձում էր համոզել, որ ինքը կլինի լավագույն վարչապետը բոլոր առումներով։ Իսկ ահա թե ինչպես են այս խոստման կատարումը գնահատում գյուղատնտեսությամբ զբաղվողները։

Հեղափոխության օրերին նա խոստանում էր ջրել գյուղացիների վարկերը, դառնալով վարչապետ` նա հայտարարեց, որ նման քայլի գնալը նպատակահարմար չէ: Իսկ այն ժամանակվա ԿԲ նախագահ Արթուր Ջավադյանը Ֆիզիկական անձանց տրամադրված գյուղացիական վարկերի, ինչպես նաև սպառողական վարկերի տույժերի և տուգանքների զիջման հետ կապված իրական և գործուն քայլեր ու միջոցառումներ այդպես էլ չարեց:

Փաշինյանը խոստանում էր, որ գյուղացին բերքը իրացնելու հետ որևէ խնդիր չի ունենալու, այնուհետև ի հայտ եկավ կոնֆլիկտը մթերող ընկերությունների, նույն Սպայկայի հետ, ինչի արդյունքում տուժեց միայն ու միայն գյուղացին: Փոխարենը` Փաշինյանը իրագործեց սպանդանոցների կառուցման ծրագիրը, ինչը, ի դեպ, չէր խոստացել և ինչին, ի դեպ, գյուղացիները դեմ էին:

Շարունակելի...