ԽԾԲ-ին յուղոտ պաշտոնների տեղավորած ՔՊ-ականները. Հայկ Ղալումյան

Ձեր ուշադրությանն ենք ներկայացնում նոր շարք, որի շրջանակներում կանդրադառնանք այն ՔՊ-ական պաշտոնյաներին, ովքեր պաշտոնը ստանձնելուց հետո չեն զլացել և իրենց ազգականներին, ծանոթներին և ընկերներին տեղավորել են պետական կառավարման համակարգում: Սկզբի համար հիշեցնենք, որ Նիկոլ Փաշինյանը հեղափոխության օրերին խոստանում էր արմատախիլ անել այդ երևույթը:

Այսօր կանդրադառնանք Տավուշի մարզպետ Հայկ Ղալումյանին: Նա Նիկոլ Փաշինյանի քավորն է։ Նրա եղբայր Վահե Ղալումյանն էլ Ազգային ժողովում պատգամավոր է աշխատում` «Իմ քայլը» խմբակցությունից։ Հայկ Ղալումյանը նաև անում էր ամեն հնարավորն ու անհնարինը, որպեսզի ԵՊՀ Իջևանի մասնաճյուղի տնօրեն նշանակվի իր ընկերը՝ շարքային դասախոս Հայկ Քամալյանը:

«Ռաշն Վոյաժ» ՍՊԸ տնօրեն Վահագն Ղալումյանը, որը, կեղծելով բանկային երաշխիքը, մասնակցել է բազմաբնակարան շենքերի մուտքերի վերանորոգման մրցույթին, Հայկ Ղալումյանի հեռավոր բարեկամն է: ԽԾԲ-ն առաջ մղելու հարցում Ղալումյանին օգնում է նաև Իջևանի համայնքապետը: Այսպես,  Արթուր Ճաղարյանը  համայնքապետարանում աշխատանքի է ընդունել մարզպետ Վահե Ղալումյանի  բաջանաղի որդուն՝ Վաչե Վիրաբյանին։ Ապա Դավիթ Վիրաբյանի դուստրը՝ 19-ամյա Նանե Վիրաբյանն է հայտնվում ՔՊ ավագանու ցուցակում։ Մարզպետ Հայկ Ղալումյանին, կարծես թե, չեն բավարարել բաջանաղի ստացած հեղափոխական բոնուսները և արդեն ընտրված քաղաքապետ Արթուր Ճաղարյանին հրահանգել է առանց այդ էլ սուղ բյուջե ունեցող քաղաքում բացել քաղաքապետի տեղակալի երկրորդ հաստիք, որն, ըստ պտտվող լուրերի, նախատեսված է հենց բաջանաղին փոխքաղաքապետ կարգելու նպատակով։ Հայկ Ղալումյանը քաղաքապետարան է մտցրել նաև իր փեսայի եղբորը՝ Աշոտ Երիցյանին։

Ազգային ժողովում շաբաթներ առաջ հրապարակվեց Վճռաբեկ դատարանի քաղաքացիական պալատի դատավորի թափուր տեղում առաջադրված 3 թեկնածուների վերաբերյալ քվեարկության արդյունքները: Ընտրված թեկնածուն՝ Արթուր Աթաբեկյանը, Հայկ Ղալումյանի հորաքրոջ որդին է:

Շարունակելի...