Մեծ Բրիտանիայի պաշտպանության նախարարի ինքնաթիռը հայտնվել է ռուսական ՌԷՊ համակարգերի թիրախում

Ռուսաստանը լռեցրել է արբանյակի ազդանշանը RAF ինքնաթիռում, որը Լեհաստանից Մեծ Բրիտանիա էր տեղափոխում երկրի պաշտպանության նախարար Գրանտ Շապսին, գրում է The Guardian-ը։

Աղբյուրները տեղեկացրել են, որ Շապսի համար վտանգ չի եղել, և կատարվածն անվանել են «ռադիոէլեկտրոնային պայքարի խիստ անպատասխանատու դրսևորում»։

Ենթադրվում է, որ GPS ազդանշանը խախտվել է 30 րոպեով, երբ օդանավը թռչում էր ռուսական Կալինինգրադի մոտով։

Բջջային հեռախոսները չեն միացել ինտերնետին, և ինքնաթիռը ստիպված է եղել օգտագործել այլընտրանքային մեթոդներ իր գտնվելու վայրը տեղորոշելու համար։

Մեծ Բրիտանիայի վարչապետի մամուլի քարտուղարը հաստատել է միջադեպը, բայց ավելացրել է, որ «ոչ մի «անսովոր բան» չկա նրանում, որ ինքնաթիռների GPS խափանումներ են լինում քաղաքների վրայով թռչելիս։

«Լեհաստանից թռիչքի ժամանակ ինքնաթիռը ժամանակավորապես բախվել է խափանումների խնդրին, երբ թռչում էր Կալինինգադի վրայով»,- ասել է Բրիտանիայի վարչապետի մամուլի քարտուղարը։

Նա ավելացրել է, որ դա չի սպառնացել ինքնաթիռի անվտանգությանը։

Պաշտպանական գերատեսչության աղբյուրները Times թերթին ասել են, որ թեև RAF ինքնաթիռները լավ պատրաստված են այդ խնդիրը լուծելու համար, «այն, միևնույն է, անհարկի ռիսկի է ենթարկում քաղաքացիական ինքնաթիռներին և կարող է սպառնալ մարդկանց կյանքին»։

Պարզ չէ՝ արդյո՞ք Շապսն ինքն է եղել թիրախը, թե՞ ոչ։