Ուկրաինայում հակամարտությունը չի ավարտվի 2024 թվականին և կարող է տարածվել տարածաշրջանում. Թուրքիայի ԱԳՆ

Թուրքիայի արտգործնախարար Հաքան Ֆիդանը հայտարարել է, որ ուկրաինառուսական հակամարտությունը, հավանաբար, չի ավարտվի 2024 թվականին, և մտահոգություն է հայտնել դրա սրման և տարածաշրջանի այլ երկրներում տարածվելու հնարավորության կապակցությամբ։ Այս մասին նա հայտարարել է CNN Turk-ի եթերում։

Բնութագրելով հակամարտությունը՝ որպես «բռնցքամարտի խաղ, որը շատ թանկ արժե», Ֆիդանն ասել է, որ Թուրքիան տեսնում է, որ հակամարտությունը տարածվում է Կենտրոնական և Արևելյան Եվրոպայում և շատ անհանգստացած է միջուկային զենքի մասին խոսակցություններից: Նրա խոսքով՝ Եվրոպայում որոշ քաղաքական գործիչներ սկսում են գիտակցել առկա ռիսկերը։ Միևնույն ժամանակ, վերջին շրջանում հաճախ են հնչում սահմռկեցուցիչ հայտարարություններ էսկալացիայի օգտին, մասնավորապես, Ուկրաինա եվրոպական զորքեր ուղարկելու վերաբերյալ։ Նա ասել է, որ դա շատ վտանգավոր է, և «անկեղծ ասած, հիմք չկա՝ կարծելու, որ 2024 թվականին հակամարտությունը կկարգավորվի»։

«Իրականությունն այն է, որ սա վերածվել է քայքայման պատերազմի՝ մեծ կորուստներով և առանց հաղթանակի։ Ռեսուրսները սպառվում են, կյանքեր են խլվում, և էսկալացիայի վտանգը մեծանում է։ Թուրքիան չափազանց անհանգստացած է այս վտանգով»,- ասել է Ֆիդանը: