Արևմուտքը Հայաստանին մղում է տնտեսական «ինքնասպանության»

Վերլուծական 19 Մարտ, 2024 20:00

Ռուսական «Միր» վճարային համակարգի քարտերը մարտի 30-ից կդադարեն գործել Հայաստանի բանկերի մեծ մասի բանկոմատներում։ Այս մասին հայտնում է РБК-ն՝ հղում անելով «ՎՏԲ Հայաստանի» ներկայացուցչին և ռուսական վճարումների շուկայում իր աղբյուրին։ Նշվում է, որ այժմ «Միր» քարտերն աշխատում են Հայաստանում և ընդունվում տեղական բանկերի կողմից։ «Ռուսական վճարային շուկայում աղբյուրը հայտնել է նաև երկրի բանկերի մեծ մասում մոտ ապագայում «Միր» քարտերի շահագործման դադարեցման մասին մասին», - հայտնում է հրատարակությունը: Լրատվամիջոցների տեղեկություններով` «ՎՏԲ Հայաստան»–ում հիմնական գործառնությունները հասանելի կլինեն «Միր» քարտապանների համար: Դրանց թվում են ՎՏԲ-ի բանկոմատներից (Հայաստան) կանխիկացում, առցանց բանկային ծառայությունների վճարումներ և առցանց գնումներ։

Ուշագրավն այն է, թե ինչպիսի սինխրոնությամբ ՀՀ բոլոր առևտրային բանկերը, բացառությամբ՝ ՎՏԲ-ի, հանկարծ որոշում կայացրին դադարեցնել «Միր» քարտերի սպասարկումը, ընդ որում այդ մասին իմանում ենք ոչ թե ՀՀ բանկերից, կամ ԿԲ-ից, այլ հենց ՎՏԲ ներկայացուցիչներից: Նման սինխրոնությունը խոսում է այն մասին, որ որոշումը քաղաքական է և ընդունված է վերևներում: Պատահական չէր, որ Եվրոպայի խորհդարանի կողմից ընդունված վերջին բանաձևում Հայաստանին կոչ էր արվում խուսափել ՌԴ-ին օգնելուց, որպեսզի հայկական կազմակերպությունները չհայտնվեն արևմտյան սանկցիաների տակ: Փաստորեն, Նիկոլ Փաշինյանի կառավարությունը որոշել է հետևել Արևմուտքի կուռատորների հորդորներին, առանց, իհարկե, հաշվարկելու, թե ինչ վնաս կարող է հասցնել Հայաստանին և մեր երկրի տնտեսությանը նման որոշումը; Ավելորդ չի լինի հիշեցնել, որ նախորդ տարվա երկնիշ տնտեսական աճը, որով այդքան հպարտանում է Փաշինյանը, ապահովել են հիմնականում հենց ռուս ռելոկանտները: Միևնույն ժամանակ պետք է հասկանալ, որ հիմնական առևտրային գործընկերոջ դեմ նման ոչ բարեկամական քայլերն անպատասխան չեն մնալու, իսկ պատասխանը Հայաստանի տնտեսության համար կարող է անչափ ցավալի լինել: Օրինակ, ռուսական կողմը կարող է արգելել դեպի Հայաստան կատարվող տրանսֆերտները: Ո՞վ է այդ դեպքում ավելի շատ տուժելու, երբ ՌԴ-ում աշխատող մեր տասնյակ հազարավոր հայրենակիցները չկարողանան ֆինանսապես օգնել իրենց ընտանիքներին:

ՌԴ–ից փոխանցումների ծավալն սկսել է կտրուկ աճել 2022–ի մարտից, երբ սկսվեց ռուսների զանգվածային ներհոսքը Հայաստան։ Ամբողջ 2022–ի ընթացքում այն աճել է 4–ից ավելի անգամ՝ գերազանցելով 3 մլրդ դոլարը։ Արդյունքում՝ տրանսֆերտները կրկին սկսել են նշանակալի դեր խաղալ ՀՀ տնտեսության մեջ, ինչպես 10–15 տարի առաջ։ 2023-ին ՌԴ-ից ուղարկված տրանսֆերտները 2022-ի համեմատ աճել են 7 անգամ և կազմել են 882 միլիոն դոլար: Հասկանալի է, որ Արևմուտքի թելադրանքով առաջնորդվելու արդյունքում կրկին տուժելու է Հայաստանի շարքային քաղաքացին, սակայն Նիկոլ Փաշինյանին և նրա թիմակիցներին այդ հանգամանքը, կարծես թե, այնքան էլ չի մտահոգում, կարևորը՝ թելադրողները գոհ մնան...