ԱՄՆ Պետդեպարտամենտը հայտնել է` ինչ է ուզում ԿԺԴՀ-ն Ռուսաստանից

«Հյուսիսային Կորեան, հավանաբար, ցանկանում է Ռուսաստանից բալիստիկ հրթիռների տեխնոլոգիան՝ սպառազինությունների մատակարարման դիմաց: Միացյալ Նահանգները տեսել է երկրների միջև փոխանակումների զգալի աճ ռազմական, ղեկավարության, տնտեսական և մշակութային մակարդակներում»: Այս մասին «Ամերիկայի Ձայն»-ին տված հարցազրույցում հայտարարել է ԱՄՆ-ի պաշտոնյա Չունգ Պարկը, ով Պետդեպում զբաղվում է Կորեայի Ժողովրդադեմոկրատական ​​Հանրապետության (ԿԺԴՀ) հարցերով։

Նրա խոսքով՝ Հյուսիսային Կորեան և Ռուսաստանը գնալով մերձենում են։ Մասնավորապես, ԱՄՆ-ին հայտնի է առնվազն 10 հազար կոնտեյների մասին, որոնք ԿԺԴՀ-ից գնացել են Ռուսաստան:

«Հյուսիսային Կորեան դա անվճար չի անում», -ընդգծել է Պարկը։

«Հավանաբար, ԿԺԴՀ-ն ցանկանում է Ռուսաստանի Դաշնությունից ստանալ բալիստիկ հրթիռների տեխնոլոգիան, այլ առաջադեմ տեխնոլոգիաներ, «երկիր-օդ» հրթիռներ կամ զրահատեխնիկա»,- պարզաբանել է Չոնգ Պակը։

«Շատ անհանգստացնող իրադարձություն է, որ ՄԱԿ-ի Անվտանգության խորհրդի մշտական ​​անդամը բացահայտորեն խախտում է Անվտանգության խորհրդի բանաձևերը, որոնք ստորագրել է միջազգային հանրության հետ, և որ նրանք ներգրավված են սպառազինությունների փոխանցման մեջ», - ասել է ամերիկացի պաշտոնյան:

Նա ընդգծել է, որ այժմ «իրոք վտանգավոր ժամանակներ են», քանի որ Հյուսիսային Կորեան կարող է Ռուսաստանից սովորել, թե ինչպես օգտագործել բալիստիկ հրթիռները մարտի դաշտում։ Դա կարող է նաև խրախուսել Հյուսիսային Կորեային ավելի առաջ մղել իր սպառազինության ծրագիրը: