«Կրոկուսի» վրա հարձակում գործած չորս մեղադրյալները կալանավորվեցին

Մոսկվայի Բասմանի շրջանային դատարանը երկու ամսով կալանավորեց «Կրոկուս Սիթի Հոլլի» վրա հարձակում գործած չորս մեղադրյալներին։

Բասմանի դատարանի նիստերը մարտի 24-ի ուշ երեկոյան անցել են դռնփակ։ Դատարանը համաձայնել է մեղադրող կողմի հետ, որ բաց նիստերը «կարող են հանգեցնել քննչական գաղտնիքի բացահայտմանը», ինչպես նաև «վտանգել գործընթացի մասնակիցների և նրանց հարազատների կյանքը»։

Նրանք բոլորը մեղադրվում են առանձնապես ծանր հանցագործության մեջ, հետևաբար, մնալով ազատության մեջ և հասկանալով, որ իրենց սպառնում է խիստ պատիժ, կարող են թաքնվել, ոչնչացնել ապացույցները կամ այլ կերպ խոչընդոտել հետաքննությանը:

Դատարանը նրանց նկատմամբ, որպես խափանման միջոց, ընտրել է կալանքը մինչև 2024 թվականի մայիսի 22-ը։

Ինչպես հայտնի է, մարտի 22-ի երեկոյան, «Պիկնիկ» խմբի համերգից առաջ, զինված անձինք կրակ են բացել նշված համերգասրահում և հրկիզել այն։

Ահաբեկչության հետևանքով՝ առնվազն 137 մարդ է զոհվել, ավելի քան 180-ը՝ վիրավորվել։

«Իսլամական պետությունը» ստանձնել է կատարվածի պատասխանատվությունը։ Ըստ արևմտյան հետախուզական գործակալությունների՝ ահաբեկչության հետևում կանգնած է «Իսլամական պետության» աֆղանական մասնաճյուղը՝ ԴԱԻՇ-Խորասան կամ Վիլայաթ Խորասան:

Մարտի 23-ի առավոտյան բերման է ենթարկվել 11 մարդ, այդ թվում՝ հարձակման 4 անմիջական մասնակից։ Նրանց ձերբակալել են Բրյանսկի շրջանում։ Ըստ ԱԴԾ-ի՝ նրանք «ծրագրում էին հատել ռուս-ուկրաինական սահմանը» և «շփումներ ունեին ուկրաինական կողմի հետ»։