ԽԾԲ-ին յուղոտ պաշտոնների տեղավորած ՔՊ-ականները. Դիանա Գասպարյան

Հիշենք, թե նախկին իշխանությանն ամենաշատն ինչի համար էին քննադատում։ Ճիշտ է՝ կոռուպցիայի, այդ թվում՝ ԽԾԲ-ի և հովանավորչության։ Իսկ հիմա մի հայացք գցենք պետական ապարատին՝ կառավարություն, նախարարություններ, Ազգային ժողով, այլ գերատեսչություններ։ ՔՊ-ական պատգամավորներն իրենց բարեկամներին ու ընկերներին բերել-լցրել են պետական համակարգ և շռայլ աշխատավարձերի, պարգևավճարների ու տունուտեղի տեր դարձրել։

Թեմայի շրջանակում այսօր կանդրադառնանք Էջմիածնի քաղաքապետ Դիանա Գասպարյանին: ԽԾԲ-ի դեմ պայքար հայտարարած քաղաքապետը, ով պետք է վերացներ նման բարքերը համայնքից, որոշում է կայացնում, որով 306240 դրամով հողամաս է վաճառվել մի քաղաքացու, ով գրանցված է այն նույն հասցեում, ինչ 2012-ին Էջմիածնի ավագանու անդամ հանդիսացող անձը:

Էլ ավելի հետաքրքիր փաստեր են ի հայտ գալիս, երբ ավելի խորն ենք փորում: Դավիթ Կոնդյանի հետ նույն հասցեում է գրանցված քաղաքացի Գոհար Ինջիղուլյանը, իսկ բուժաշխատողների համար նախատեսված կեքսերը, ինչպես գիտենք, գնվել են Սուսաննա Ինջիղուլյանից: Բացի այդ, 240 հազար դրամ էլ հատկացվել է տորթերի համար և ձեռք են բերվել դրանք նույնպես Սուսաննա Ինջիղուլյանից:

Քաղաքապետի մեկ այլ որոշմամբ գազալցակայան կառուցելու թույլտվություն է տրվել Աշոտ Միրզոյան ԱՁ-ին: Ուշագրավն այն է, որ 2020-ին Էջմիածնի ավագանու անդամ էր Միրզոյան Արամայիս Աշոտը:

Բացի այդ, Դիանա Գասպարյանը վերջերս նշանադրվել է: Գասպարյանի նշանածը մեկ տարի փոքր է քաղաքապետից և Էջմիածնի ՔՊ ավագանու անդամ է։ Բացի այդ, նա «Արմֆայթինգ Զվարթնոց» մարզական ակումբի պատվավոր նախագահն է։ 

Սկանդալային պատմության կիզակետում էր հայտնվել նաև Դիանա Գասպարյանի կեսուրը: Հետք-ը գրել էր, որ  Գասպարյանի ամուսնու ընտանիքն Էջմիածնում առանձնատների կառուցման բիզնես է սկսել: Այդ նպատակով, գործընկերների օգնությամբ, ձեռք է բերվել համայնքային հողատարածք և, չսպասելով թույլտվություններին՝ հողային և բետոնացման աշխատանքներ են կատարվել: «Նարե Պլյուս» ընկերության միակ սեփականատերը համայնքի ղեկավար Դիանա Գասպարյանի սկեսուրն է՝ ավագանու անդամ Արամայիս Միրզոյանի մայրը: Ընկերությունը նոր է ստեղծվել՝ 2023թ. հուլիսի 17-ին: Ռուզաննա Ասատրյանը «Նարե Պլյուս» ՍՊԸ-ի միակ սեփականատերն ու տնօրենն է: Սակայն, ՍՊԸ-ի գործերով իրականում զբաղվում է որդին՝ Արամայիս Միրզոյանը։ Նա հաճախ է հայտնվում շինհրապարակում և ցուցումներ տալիս շինարարներին: Սկզբում ընկերության կապիտալը եղել է 5000 դրամ, սակայն մեկ ամիս անց՝ օգոստոսին, այն հասել է 51 մլն 575 հազ. դրամի:

Շարունակելի...