«Հեղափոխական անդարդությունն» ու 4 տարի կառուցվող 13 տունը

Կառավարությունը՝ ի դեմս վարչապետի, ՏԿԵ նախարարի, Քաղշինկոմիտեի նախագահի և Սյունիքի մարզպետի խոստանում էր մինչև 2021 թվականի ավարտը շուռնուխցիներին հանձնել 13 նորակառույց տուն՝ Ադրբեջանին հանձնած տների դիմաց: Այս տարիներին 5 անգամ ժամկետը երկարացվել է, բայց մինչ օրս տները պատրաստ չեն: Սյունիքի մարզպետը, որը փաստացի չի կատարել իր մարզի բնակիչներին տված խոստումը, հայտարարում է, որ բացի Շուռնուխի 10 տներից, երկրում բազմաթիվ շենքեր են կառուցվել, բազմաթիվ ծրագրեր են իրականցվել: Թե ինչ կապ ունի Ռոբերտ Ղուկասյանը կառուցված բազմաթիվ այլ շենքերի և բազմաթիվ այլ ծրագրերի հետ՝ դժվար է ասել, մի դեպքում, երբ նա ի վիճակի չէ բացատրել, թե ինչն է պատճառը, որ նման շինարարական բումի ֆոնին իր մարզում 13 տուն չեն կարողանում կառուցել:

Մինչդեռ, եթե մենք ապրեինք իրապես ժողովրդավարական երկրում, ապա մարզպետն արդեն իսկ պետք է լքած լիներ իր պաշտոնը: Օրինակ, Մեծ Բրիտանիայի ֆինանսների նախարար Քվազի Քվարթենգը հրաժարական էր ներկայացրել այն պատճառով, որ իր ռեֆորմները նպատակին չէին հասել և ֆինանսական շուկաներում լուրջ խառնաշփոթ էր սկսվել: Ռումինիայի առողջապահության նախարար Ֆլորին Կիցուն հրաժարական ներկայացրեց, քանի որ տապալել էր կորոնավիրուսային համավարակի դեմ պայքարը: Ընդ որում, այս սկզբունքայնությունը առկա է ոչ միայն արևմտյան երկրներում, օրինակ՝ ամիսներ առաջ պաշտոնից ազատվել էր Ղրղզստանի կրթության նախարարը, պատճառը՝ իր պարտականությունները ոչ պատշաճ կատարելու համար:

Փաշինյանն ու իր կաբինետի անդամները հասկանալի պատճառներով հեռու են նման սկզբունքայնություն և քաղաքական կամք դրսևորելուց, արդյունքում աննախադեպ ձեռքբերումներով հպարտացող կառավարությունն ի վիճակի չէ 4 տարում 13 տուն  կառուցել, ընդ որում վարչապետի մոտ մարզպետին ուղղված հարցեր չեն առաջանում, մարզպետն էլ հայտարարում է՝ ի՞նչ է եղել որ, կարևորը՝ այլ մարզերում ամեն ինչ ժամանակին է արվում...