Խուզարկություններ Եգիպտոսում. «Նման խուզարկություններ անգամ Մուբարաքի օրոք չեն կատարվել»

ԱՄՆ-ն եւ Գերմանիան խիստ քննադատության են ենթարկել դեկտեմբերի 29–ին Եգիպտոսի անվտանգության ուժերի և ոստիկանության կողմից ամբողջ երկրի տեղական և միջազգային կազմակերպությունների գրասենյակներում մասշտաբային խուզարկություններ իրականացնելու համար։

Եգիպտոսի անվտանգության ուժերը ժամանակավորապես ձերբակալել են այդ գրասենյակների աշխատակիցներին և ստուգումներ իրականացրել նրանց համակարգիչներում գտնվող ֆայլերում։ Այս մասին հաղորդում է արաբական «Al Jazeera»–ն՝ հղում անելով տեղի մարդու իրավունքների պաշտպանության եւ անվտանգության ծառայություններին։

Ըստ «MENA» լրատվական գործակալության՝ խուզարկությունները կատարվել են 17 ոչ կառավարական կազմակերպություններում՝ այդ թվում երկու ամերիկյան կազմակերպություններում, որոնք երկու քաղաքական կուսակցություններին խորհրդատվական ծառայություններ են մատուցում։ Խուզարկություններն իրականացվել են կապված կազմակերպությունների արտաքին ուժերի կողմից ֆինանսավորվելու պատճառով։ Բացի այդ, այդ կազմակերպությունները իբրև թե թույլտվություն չունեն Եգիպտոսում գործունեություն իրականացնելու համար։

Վաշինգտոնն իր խորին ափսոսանքն է հայտնել տեղի ունեցածի առնչությամբ և կոչ է արել Եգիպտոսի իշխանություններին դադարեցնել ոտնձգությունները Մարդու իրավունքների պաշտպանությամբ զբաղվող կազմակերպությունների նկատմամբ։ ԱՄՆ Պետքարտուղարության խոսնակ Վիկտորիա Նուլանդը հայտարարել է, որ, եթե նման գործողությունները չդադարեն, Վաշինգտոնը կարող է վերանայել Միացյալ Նահանգների կողմից եգիպտական բանակին ֆինանսական աջակցություն ցույց տալու հարցը։

Ըստ Նուլանդի՝ ԱՄՆ-ի իշխանությունները տեղի ունեցածի վերաբերյալ իրենց դժգոհությունն են արտահայտել Եգիպտոսի վարչապետ Քամալ ալ Գանզուրիից և Վաշինգտոնում Եգիպտոսի դեսպանից։  

Բացի Վաշինգտոնից տեղի ունեցածի համար իր դժգոհությունն էր հայտնել նաև պաշտոնական Բեռլինը։ Եգիպտոսի անվտանգության ծառայությունները խուզարկություններ են անցկացրել նաև Կահիրեում գտնվող Կոնրադ Ադենաուերի անվան գրասենյակում, որը սերտ կապերի մեջ է Գերմանիայի կանցլեր Անգելա Մերկելի ներկայացրած կուսակցության հետ։ Գերմանիայի արտաքին գործերի նախարարությունը դեկտեմբերի 30-ին իր երկրում Եգիպտոսի դեսպանից տեղի ունեցածի առնչությամբ բացատրագիր է պահանջել։