ՔՊ-ական պաշտոնյաների արտոնյալ ԽԾԲ-ն. Նազելի Բաղդասարյան

Շարունակելով ներկայացնել այն պաշտոնյաներին, ում ծանոթները, ազգականները և բարեկամները Նոր Հայաստանում հարմարավետ տեղավորվել են պետական կառավարման համակարգում կամ իրենց արտոնյալ են զգում, այսօր կխոսենք Նազելի Բաղդասարյանի մասին:

Դեռևս  Գյումրիում ՏԻՄ ընտրություններին ՔՊ ցուցակում ակնհայտ կերպով երևում էր Բաղդասարյանի ներկայությունը` ի դեմս իր ազգականների և ընկերների: Ցուցակի երրորդ համարը Բաղդասարյանի ընկերուհին էր՝ Գյումրու ինֆեկցիոնի տնօրեն Աստղիկ Բեյբությանը, վեցերորդը՝ օգնականն էր՝ Հարությունյան Քնարիկը:

Նազելի Բաղդասարյանի եղբայրը՝ Արման Բաղդասարյանը, որը Գյումրու ավագանու «Քաղաքացիական պայմանագիր» խմբակցության անդամ էր, իր կնոջ անվան հետ կապված սկանդալի ֆոնին վայր դրեց մանդատը և ընդհանրապես դուրս եկավ ՔՊ-ից:

 Նազելի Բաղդասարյանի եղբոր կինն էլ՝ Անի Քոչարյանը, որը Շիրակի պետական համալսարանի (ՇՊՀ) մագիստրատուրայի առաջին կուրսի ուսանողուհի է, ստանձնել էր քաղաքապետարանի արարողակարգի բաժնի պետի պաշտոնը, սակայն հետագայում նույնպես ստիպված եղավ ազատման դիմում ներկայացնել:

Բաղդասարյանն ավագանու անդամ ընկերուհուն՝ արդեն իսկ վերը նշված Քնարիկ Հարությունյանին, մարզպետարանում պաշտոնի էր նշանակել։  Վերջինս ֆեյսբուքյան իր էջում գրել էր․ «Հետայսու աշխատանքային գործունեությունս շարունակելու եմ Շիրակի մարզպետարանում՝ որպես մարզպետի խորհրդական: Համեստ կարողություններս ներդնելու եմ մարզում առկա խնդիրների լուծմանն ի նպաստ»: Քնարիկ Հարությունյանը Բաղդասարյանի ընտանիքին պատկանող «Ցայգ» ՀԸ աշխատակից էր, հետո Բաղդասարյանի օգնականը՝ ԱԺ-ում։ Ավելի ուշ հենց Բաղդասարյանի ջանքերով ներառվեց ՔՊ-ի ավագանու ցուցակում։ Նա էր «Բալասանյան դաշինքի» ներկայացուցչի հետ կոալիցիոն համագործակցության հուշագրի տակ ստորագրողը։

Նազելի Բաղդասարյանի հետ մտերիմ հարաբերությունների մեջ գտնվող Արթուր Նաջարյանը ևս նշանակվել էր մարզպետի խորհրդական։