ԱՄՆ-ն «Կրոկուսը» մատնանշել էր որպես ահաբեկչական հարձակման հավանական թիրախ․ WP

Մարտի սկզբին Ռուսաստանի հետախուզական ծառայություններին զգուշացնելով Ռուսաստանում ահաբեկչական հարձակման սպառնալիքի մասին՝ Միացյալ Նահանգները որպես հարձակման հավանական թիրախ մատնանշել է «Կրոկուս Սիթի Հոլ» համերգասրահը: Այս մասին գրում է The Washington Post-ը՝ վկայակոչելով իրավիճակին ծանոթ երկու անանուն ամերիկացի պաշտոնյաների։

«Նախազգուշացման բարձր հստակությունն ընդգծում էր Վաշինգտոնի համոզմունքը, որ «Իսլամական պետությունը» հարձակում է նախապատրաստում, որը կսպառնա մեծ թվով խաղաղ բնակիչների, և ուղղակիորեն հակասում է Մոսկվայի այն պնդումներին, որ ԱՄՆ-ի նախազգուշացումները չափազանց ընդհանրական էին՝ հարձակումը կանխելու համար», - ասվում է հրապարակման մեջ:

Հրատարակության համաձայն՝ ամերիկյան հետախուզական ծառայությունները ՌԴ ԱԴԾ-ին տեղեկություն են տրամադրել մոտալուտ ահաբեկչության մասին մարտի 6-ին՝ Ռուսաստանում ԱՄՆ դեսպանատան կողմից Մոսկվայում ահաբեկչության հնարավոր սպառնալիքի մասին հաղորդագրությունը հրապարակելուց մեկ օր առաջ։ Նշվել է նաև, որ ահաբեկչությունը կարող է տեղի ունենալ համերգի ժամանակ։ Թերթի աղբյուրներից մեկի համաձայն՝ ԱՄՆ-ը նաև զգուշացրել է Ռուսաստանի իշխանություններին Մոսկվայում սինագոգի վրա հնարավոր հարձակման մասին։ Մարտի 7-ին ՌԴ ԱԴԾ-ն հայտարարեց մոսկովյան սինագոգում ահաբեկչություն կանխելու մասին։