Վահե Հովհաննիսյանը «ջրում» է Փաշինյանի տված խոստումները

2018 և 2021 թվականների արտահերթ խորհրդարանական ընտրություններից առաջ Նիկոլ Փաշինյանը և նրա թիմակիցները քաղաքացիներին գրեթե հարկային դրախտ էին խոստանում, արտոնություններ՝ հայտարարելով, որ իրենք պատրաստվում են նվազեցնել հարկային բեռը, թեթևացնել վարչարարությունը: Իրականությունը, սակայն, մեղմ ասած, այլ տեսք ունի:

Այսպես, Երևանից հետո  Վահե Հովհաննիսյանի ղեկավարած ֆինանսների նախարարությունը մտադիր է վերացնել եկամտային հարկի վերադարձով բնակարան գնելու հնարավորությունը նաև մարզերում։ Ըստ նախագծի՝ 2027-ից Արագածոտնի, Արարատի, Արմավիրի և Կոտայքի մարզերում, իսկ 2029-ից ամբողջ հանրապետությունում հիփոթեքային վարկով բնակարան գնելիս եկամտային հարկը չի վերադարձվի։ Բացառություն կլինեն միայն կառավարության ցանկով հաստատված սահմանամերձ բնակավայրերը։

Այնուհետև ներդրվեց ֆիզիկական անձանց համընդհանուր հայտարարագրման համակարգը:   Ընդ որում, պարզ չէ, թե հայտարարագրված եկամուտների ո՞ր մասն է հարկվելու: Այս համատեքստում՝ մասնավոր տրանսֆերտները, նվիրատվությունը կամ ստացված ժառանգությունը հարկվելո՞ւ են, թե ոչ: 

Բացի այդ, Հայաստանի կառավարությունը նախատեսում է 2024 թվականի հոկտեմբերից վերանայել շրջանառության հարկի համակարգը, իսկ հետագայում, ընդհանրապես, հրաժարվել դրանից։ Ֆինանսների նախարարությունում գտել են, որ համակարգում հարկային բեռը զգալիորեն ցածր է, քան նրանց համար, ովքեր աշխատում են ընդհանուր հարկման դաշտում, ինչը գայթակղություն է ստեղծում նրանց համար, ովքեր ցանկանում են խուսափել ողջ ծավալով հարկերի վճարումից:

Ընթացիկ տարում Հայաստանը գնացել է մի շարք ապրանքների, մասնավորապես, ծխախոտի և թունդ ալկոհոլի ակցիզային հարկի դրույքաչափի բարձրացման, ինչը, բնականաբար, լրջորեն հարվածել է սպառողների գրպանին: