ԱՄՆ-ն սահմանափակել է իր դիվանագետների տեղաշարժն Իսրայելում

Իսրայելում ԱՄՆ դեսպանատունը կարգադրել է իր աշխատակիցներին «անվտանգության նկատառումներից ելնելով» չմեկնել Երուսաղեմից, Թել Ավիվից և Բիրշեբա քաղաքներից դուրս, գրում է BBC-ն։

Պետքարտուղարության խոսնակ Մեթյու Միլլերը լրագրողների հետ զրույցում չի բացահայտել նման նախազգուշական միջոցների պատճառները՝ հավելելով միայն, որ ԱՄՆ-ն ուշադիր հետևում է Մերձավոր Արևելքում և հատկապես Իսրայելում սպառնալիքներին։

Նախօրեին ԱՄՆ նախագահ Ջո Բայդենը հայտարարեց, որ Իրանը, ամենայն հավանականությամբ, պատրաստվում է հարվածներ հասցնել Իսրայելում թիրախներին՝ ի պատասխան Դամասկոսում Իրանի հյուպատոսության վրա հարձակման։ Սպիտակ տան ղեկավարը հավելել է, որ այս սպառնալիքների լույսի ներքո Իսրայելին ամերիկյան աջակցությունը կշարունակի մնալ «երկաթե»։

Ըստ The Wall Street Journal-ի՝ Իսրայելն Իրանից ուղիղ հարձակում է ակնկալում առաջիկա 24-48 ժամվա ընթացքում։ Ենթադրվում է, որ հարձակման են ենթարկվելու երկրի հարավը կամ հյուսիսը։ Միևնույն ժամանակ, Axios-ի աղբյուրները նշում են, որ իրանական հարձակումը կսահմանափակվի՝ տարածաշրջանում իրավիճակի սրումը կանխելու համար։