Նուբար Աֆեյանը նոր հիմնադրամ է ստեղծում

Afeyan Philanthropies կազմակերպությունը ստեղծում է Afeyan Initiatives for Armenia (AIFA) զարգացման հիմնադրամը։

AIFA զարգացման հիմնադրամը ձգտելու է խթանել կրթությունը, նորարարությունն ու ձեռներեցությունը և կայուն զարգացումը Հայաստանում:

«Ավելի քան երկու տասնամյակ մեր ջանքերն ուղղել ենք Հայաստանի կայուն ապագային. ապագա, որտեղ խրախուսում են նորարարությունը, խթանում ներառականությունը և առաջնահերթություն տալիս բոլոր քաղաքացիների բարեկեցությանը»,- նշել են Afeyan Philanthropies կազմակերպության հոգաբարձուներ Նուբար և Աննա Աֆեյանները,- «AIFA նախաձեռնության միջոցով մենք նպատակ ունենք ամրապնդելու մեր կատարած աշխատանքը, իրականացնելու նոր ծրագրեր և համագործակցելու նոր գործընկերների հետ՝ ընդլայնելու նախաձեռնությունների ազդեցությունը: Օգտագործելով տարբեր շահագրգիռ կողմերի հավաքական փորձը և ռեսուրսները՝ մենք ձգտում ենք դրական փոփոխություններ իրականացնել Հայաստանի բազմաթիվ ոլորտներում՝ ներառյալ առողջապահության, գիտության և տեխնոլոգիաների, ինչպես նաև արվեստի»:

AIFA զարգացման հիմնադրամի գործադիր տնօրեն է նշանակվել հասարակական կազմակերպություններում կառավարման փորձառու ղեկավար Դալար Կազանջյանը:

Afeyan Initiatives for Armenia նախաձեռնությունը Afeyan Philanthropies կազմակերպության հայաստանյան ներկայացուցչությունն է: Հիմնվելով Աֆեյանների ընտանիքի կողմից ավելի քան երկու տասնամյակ Հայաստանում իրականացված բարեգործական նախաձեռնությունների վրա՝ AIFA-ն կդառնա Հայաստանում Աֆեյանների ընտանիքի ընթացիկ և ապագա զարգացման նախաձեռնությունների համար ռազմավարական և գործառնական կենտրոն: Afeyan Philanthropies կազմակերպությունն այս պահին ամբողջովին կամ մասամբ ֆինանսավորում և իրականացնում է հետևյալ ծրագրերը՝ «Հայաստան 2041» հիմնադրամ, «Ավրորա» մարդասիրական նախաձեռնություն, FAST Հայաստանի գիտության և տեխնոլոգիաների հիմնադրամ, «ԱՊԱԳԱ ՀԱՅԿԱԿԱՆԸ» հիմնադրամ, «ՀԵՆԱՐ» հիմնադրամ և «Հայկական Հոգևոր վերականգնման» հիմնադրամ: