«Այսօր ևս մեկ կարևոր քայլ արվեց Հայաստանի բարձր տեխնոլոգիական ոլորտի համար»․ Հայրապետյան

Այսօր ևս մեկ կարևոր քայլ արվեց Հայաստանի բարձր տեխնոլոգիական ոլորտի համար. ստորագրվել է համագործակցության պայմանագիր «Աքսելերացիոն ծրագիր» դրամաշնորհային մրցույթում հաղթած Plug and Play Germany GmbH ընկերության հետ: Այդ մասին հայտնում է ԲՏԱ նախարար Մխիթար Հայրապետյանը։ 

Plug and Play Germany GmbH ընկերությունը, որն ընտրվել է մրցակցության հայտ ներկայացրած չորս միջազգային կազմակերպություններից, կգլխավորի 26-շաբաթյա ծրագիր, որն ուղղված է հայկական ստարտափների հնարավորությունների ընդլայնմանը՝ խորհրդատվական ծառայությունների, կարողությունների զարգացման, բիզնեսի զարգացման աջակցության, նորարարությունների աջակցության և անհատական մենթորության միջոցով: Մրցույթի համար նախատեսված բյուջեն կազմում է 336 մլն ՀՀ դրամ:

Plug and Play-ը, որը հայտնի գլոբալ նորարարական հարթակ է, և որի կենտրոնակայանը գտնվում է Սիլիկոնյան հովտում, ունի տպավորիչ փորձ աջակցելու նորաստեղծ ձեռնարկություններին մենթորության, ֆինանսավորման և ցանցի միջոցով: Նրանց հսկայական ցանցը ներառում է համագործակցություն այնպիսի հսկաների հետ, ինչպիսիք են՝ VISA, ROCHE, JAGUAR LAND ROVER, WALMART, Mercedes-Benz, VOLVO, PORSCHE և NISSAN: Նրանց պորտֆելում կան հաջողակ այնպիսի նախագծեր, ինչպիսիք են՝ PayPal-ը, Dropbox-ը, Honey-ը, SoundHound-ը, Rappi-ն, CourseHero-ն, Pinterest-ը, Pony.ai-ը և այլն:

Մենք ոգևորված ենք այս գործընկերության ներուժով և անհամբեր սպասում ենք այն դրական ազդեցությանը, որն այն կունենա մեր երկրի տեխնոլոգիական ոլորտի վրա, նշել է նախարարը։