Ճաքերը Ձեր ֆոնդին չեն սպասում. բնակիչները բողոքում են շենքի վթարային վիճակից (տեսանյութ)

Հալաբյան փողոցի 3-րդ շենքի բնակիչները բողոքում են իրենց բնակարանների անմխիթար վիճակից:

Բնակիչներից մեկը՝ Լալա Աբրահամյանը, այլևս անհնար է համարում ապրել 4-րդ կարգի վթարային վիճակում գտնվող իր բնակարանում:

Ինքը և շենքի մյուս բնակիչները բազմիցս դիմել են համապատասխան մարմիններին՝ օգնության ակնկալիքով: Նամակ են ուղարկել երկրի նախագահին, Արտակարգ իրավիճակների նախարարությանը, ինչպես նաև՝ քաղաքապետարանին, որտեղից էլ ստացել են պատասխան, որ իրենց շենքն ընդգրկվել է ՀՀ 2013-2015թթ. միջնաժամկետ ծախսային ծրագրի ՀՀ քաղաքաշինության նախարարության ֆինանսավորման հայտի նախագծում: Սակայն բնակիչները չեն կարողանում ապրել նման պայմաններում և խնդրում են հարցին շուտափույթ լուծում տալ, քանի որ ճաքերն օր օրի ավելի են լայնանում, կրող պատերը թուլացել են, իսկ փլուզման վտանգը մեծացել է, բացի այդ, բնակիչներն անգամ օձ և կարիճ են հայտնաբերել շենքի բակում:

Թաղապետարանից բնակիչներին հավաստիացրել են, որ Մարգարյան 37 հասցեում կառուցվող նորակառույց շենքում, հնարավոր է, իրենց բնակարան հատկացվի, բայց բնակիչները խնդրում են, որ գոնե այդ փաստը հաստատող փաստաթուղթ ստորագրվի, քանի որ նախկինում մեկ անգամ էլ էին խոստացել բնակարան տալ, բայց խոստումն այդպես էլ չէին կատարել:

Ներկայացնում ենք տեսանյութ, որում երևում է, թե ինչպիսի պայմաններում են ապրում մեր քաղաքացիներն իրենց բնակարաններում.