ԱՄՆ-ն Կիևին 125 մլն դոլարի ռազմական օգնության նոր փաթեթ է պատրաստել

ԱՄՆ նախագահ Ջո Բայդենի վարչակազմը Ուկրաինային կուղարկի 125 մլն դոլար արժողությամբ ռազմական օգնության հերթական փաթեթը, հայտնում է Associated Press գործակալությունը՝ հղում անելով Սպիտակ տան աղբյուրներին։

Փաթեթը կներառի հակաօդային պաշտպանության համակարգերի հրթիռներ, HIMARS հրթիռային համակարգերի զինամթերք, հակատանկային շարժական Javelins և այլ համակարգեր, անօդաչու թռչող սարքերի դեմ պայքարի համակարգեր և սարքավորումներ, 155 մմ և 105 մմ տրամաչափի հրետանային զինամթերք, մեքենաներ և այլ սարքավորումներ։

AP-ն նշում է, որ առաքումը նախատեսված է այն ժամանակահատվածի համար, երբ Վաշինգտոնն աշխատում է Կիևի հետ՝ «ավելի լավ հասկանալու Կիևի ներխուժումը Ռուսաստան»:

Ինչպես լրագրողներին ճեպազրույցում ասել է Պենտագոնի ներկայացուցիչ Սաբրինա Սինգհը, Միացյալ Նահանգները, չնայած Կիևի բացատրություններին, դեռևս հարցեր ունի Ռուսաստանի Դաշնության Կուրսկի շրջանում Ուկրաինայի գործողությունների նպատակների և խնդիրների վերաբերյալ։

«Ինչ վերաբերում է նպատակներին, ես ձեզ փոխանցում եմ այն, ինչ մի քանի օր առաջ հայտարարեց Զելենսկին, դա համապատասխանում է նրանց ռազմավարական նպատակներին մարտի դաշտում»,- ասել է Սինգհը։