«Հայաստանի օլիմպիական տան» դեմքը ֆուտբոլի աշխարհի առաջնության չեմպիոն Յուրի Ջորկաեֆն է

Փարիզի 2024 թ. ամառային 33-րդ Օլիմպիական խաղերին ընդառաջ՝ Ֆրանսիայի մայրաքաղաքում հուլիսի 25-ին պաշտոնապես բացվել է «Հայաստանի օլիմպիական տունը»:

ՀՀ ԿԳՄՍՆ-ի հաղորդմամբ, «Հայաստանի օլիմպիական տան» դեմքը ֆուտբոլի աշխարհի առաջնության չեմպիոն Յուրի Ջորկաեֆն է:

Ողջունելով ներկաներին՝ ՀՀ նախագահ Վահագն Խաչատուրյանը շնորհակալություն է հատնել Հայաստանի հավաքականի մարզիկներին, որոնց շնորհիվ հնարավորություն ունենք ներկայացնելու մեր երկիրը 33-րդ Օլիմպիական խաղերին:

«Ակնկալիքը մեկն է՝ տեսնել ՀՀ դրոշը բարձրացված, տեսնել ուրախ և հաղթանակած ժպիտներ»,- ասել է Վահագն Խաչատուրյանն ու հաջողութուն մաղթել Օլիմպիական խաղերին մասնակցող մարզիկներին:

ՀՀ նախագահը նաև կարևորել է ՀՀ կառավարության կողմից ֆիզիկական կուլտուրային և սպորտին հատկացվող մեծ ուշադրությունը, այդ թվում՝ մասսայական սպորտի զարգացման ուղղությամբ, որի նպատակով տարվա ընթացքում 5 մարզաձևերից անցկացվում են «ՀՀ վարչապետի գավաթ» խորագիրը կրող սիրողական մրցաշարերը:

ՀՀ վարչապետի աշխատակազմի ղեկավար Արայիկ Հարությունյանը շնորհավորել է «Հայաստանի օլիմպիական տան» բացման կապակցությամբ. «Հուսով եմ՝ մինչև օգոստոսի 11-ը մենք բազմաթիվ հնարավորություններ ենք ունենալու այստեղ պատվելու մեր մարզիկներին: Հուսով եմ՝ Օլիմպիական խաղերից հետո կխոստանանք առնվազն չորս նոր մարզադպրոց կառուցել ՀՀ-ում՝ մեր օլիմպիականների պատվին»:

Արայիկ Հարությունյանը նշել է՝ վերջին տարիներին ՀՀ կառավարությունը սպորտին և հայ մարզիկներին առավելագույնս սատարելու հանձնառություն է ստանձնել. տարեցտարի ավելանում են ոլորտին հատկացվող ֆինանսական միջոցները, ՀՀ-ում անցկացվում են մարզական խոշոր առաջնություններ, ենթակառուցվածքների զարգացման նպատակով կառուցվում են նոր մարզադպրոցներ: Արայիկ Հարությունյանն ընդգծել է՝ Հայաստանը 2027 թվականին հյուրընկալելու է Ֆրանկոֆոնիայի մարզամշակութային խաղերը՝ պատրաստ լինելով ընդունելու շուրջ 6000 մարզիկների աշխարհի տարբեր ծայրերից: Այս առումով, ֆրանսիական փորձի ուսումնասիրությունը ևս կարևոր է:

ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը ներկայացրել է «Հայաստանի օլիմպիական տուն» նախաձեռնության մանրամասները:

«Ֆրանսիան մեզ համար բարեկամ և հայաշատ երկիր է: «Հայաստանի օլիմպիական տան» նպատակը երկրպագու-մարզիկ կապերն ամրապնդելն է: Այստեղ կհանդիպեն մարդիկ, որոնք կուզենան հայանալ, ավելի շատ հայ դառնալ, հայություն շնչել: Մարզիկներն իրենց ելույթների հաջորդ օրը գալու են Հայաստանի օլիմպիական տուն, շփվելու են լրագրողների և երկրպագուների, հայ համայնքի ներկայացուցիչների հետ, իսկ տեղում՝ մեծ էկրանին, երկրպագուները հնարավորություն են ունենալու հետևելու մարզիկների ելույթներին»,- ներկայացրել է նախարարի տեղակալը:

Կարեն Գիլոյանը տեղեկացրել է՝ նախաձեռնությունն իրականացվում է «Fastex», «ՅՈՒՆԻԲԱՆԿ» և «ՅՈՒՔՈՄ» ընկերությունների հետ համագործակցությամբ և շնորհակալություն հայտնել աջակցության համար:

«Պետությունն, իհարկե, շատ մեծ ուշադրություն է դարձնում սպորտին, հատկացնում է մեծ գումարներ, բայց սպորտը միայն պետության աջակցությամբ չի կարող զարգանալ. անհրաժեշտ են մարդիկ, որոնք կա՛մ կսիրեն սպորտը, կա՛մ՝ երկիրը: Սիրել սպորտն ու երկիրը՝ գրեթե հոմանիշներ են: Երկիրը ճանաչել տալու ամենակարճ և դյուրին ճանապարհը սպորտի միջոցով հաղթանակներ կերտելն է: Հայաստանի տունը գործելու է Հայաստանի բարեգործական ընդհանուր միության շենքում, ինչի համար ևս շնորհակալ ենք ՀԲԸՄ մեր գործընկերներին»,- ասել է նախարարի տեղակալը:

«Հայաստանի օլիմպիական տունը» կգործի Հայկական բարեգործական ընդհանուր միության շենքում՝ 118 Rue, Courcelles 75017, Paris հասցեում: Հայկական տունը կբացվի ամեն օր՝ ժամը 15:00-ից 23:00-ը: Այդ ժամերին այցելուները կարող են վայելել օլիմպիական մրցաշարերի համատեղ դիտումները, հանդիպել հայտնի մարզիկների հետ և ձեռք բերել ատրիբուտիկա՝ աջակցելու հայկական մարզիկներին մարզադաշտերում:

Այս թեմայով Վերջին 5 ամիսներին աճել է Հայաստանի և Իրանի միջև առևտուրը Հայաստանի օպերայի պատմության մեջ նոր էջ է բացվում՝ աշխարհի ամենահեղինակավոր կառույցի հետ համագործակցությամբ ԱՄՆ-ի Փիթսբուրգ քաղաքը սեպտեմբերի 21-ը հայտարարել է «Հայաստանի ազգային օր» Սեպտեմբորի 27-ին Չինական մեծ պատի մոտ կմեկնարկի Հայաստանի մշակութային օրերը. Արմեն Մխիթարյան Հայաստանի շախմատի տղամարդկանց թիմն Օլիմպիադայում գրավեց 6-րդ տեղը՝ հաղթելով Իրանի ընտրանուն