Տասը միլիոն դրամի տուգանք մենաշնորհային դիրքի չարաշահման համար

Դեռևս ամռանը մամուլում հայտնվեցին դժոհություններ Երևան-Գավառ երթուղին սպասարկող «Գավառտրանս» ընկերությունից, որը մրցույթում ներկայացրել էր Երևան-Գավառ երթուղու համար ամենացածր սակագինը՝ հինգ հարյոր դրամ՝ շահելով լիցենզիան, սակայն ուղևորափոխադրումներ իրականացնում էր հազար դրամով՝ չշահագործելով 303 համարի երթուղին և մարդկանց ստիպելով ուղևորվել 326 երթուղով։

Ի սկզբանե սպառողների և լրագրողների տարակուսանքն էր հարուցել այն փաստը, որ միևնույն ուղղությունն սպասարկող 313 և 326 երթուղիների ուղեվարձը սահմանվել էր հազար դրամ, իսկ 303 երթուղունը՝ հինգ հարյուր։

Այդ հրապարակումներից հետո հարցով սկսեց զբաղվել ՀՀ Տնտեսական մրցակցության պաշտպանության պետական հանձնաժողովը, որն այսօր հրավիրված մամուլի ասուլիսում հրապարակեց իր որոշումը։

ՏՄՊՊՀ Վերահսկողության վարչության առաջատար մասնագետ Հայկ Վարդանյանը ներկայացրեց հանձնաժողովի կատարած քննության ընթացքն ու կայացված որոշումը, ըստ որի՝ «Գավառտրանս» ՍՊԸ-ն չարաշահել է իր գերիշխող դիրքը, քանի որ այն Գավառն ու հարակից գյուղերը սպասարկող միակ ընկերությունն է։ «Գավառտրանսը» խոչընդոտել է այլ ընկերությոնների մուտքը նշված շուկա, քանի որ առաջարկել է անհամեմատ ցածր գին, ինչի շնորհիվ շահել է մրցույթը։ Սակայն ընկերությունը միտումնավոր չի կատարել իր պարտավորությունները՝ չշահագործելով իր առաջարկած երթուղին և անուղղակի կերպով ստիպելով Գավառ մեկնողներին վճարել կրկնակի գին։

Քննության արդյունքում հանձնաժողովն առաջարկեց «Գավառտրանսի» համար սահմանել տասը միլիոն դրամի տուգանք, որը պետք է վճարվի տասնօրյա ժամկետում, ինչպես նաև հանձնարարեց ընկերությանը եռօրյա ժամկետում վերացնել խախտումը։ Հակառակ դեպքում «Գավառտրանսը» կզրկվի լիցենզիայից՝ շուկա մուտք գործելու հնարավորություն տալով առավել բարեխիղճ տնտեսվարողների։

Լրագրողների հարցին, թե հայտնի՞ է՝ ինչքան ժամանակ է ընկերությունն ուղևորափոխադրումներ իրականացրել հազար դրամով և ինչքան գերշահույթ է ստացել, Հայկ Վարդանյանը պատասխանեց, որ իրենց նման տվյալներ հայտնի չեն, քանի որ գործնականում անհնար է որոշել՝ ուղևորների որ մասը կնախընտրեր մեկնել 326 երթուղով, որի ուղեվարձը հազար դրամ է, և որ մասը՝ 303-ով։

Նա նշեց նաև, որ միկրոավտոբուսների վրա փակցված չեն եղել երթուղու համարը նշող ցուցանակներ, ինչը սպառողների իրավունքների կոպիտ խախտում է, քանի որ հնարավորություն չի տալիս իմանալու, թե որ համարի երթուուն է պատկանում տվյալ փոխադրամիջոցը։