Եգիպտոսի դատախազությունը պահանջել է կախաղանի միջոցով մահապատժի ենթարկել երկրի նախկին նախագահին

Եգիպտոսի գլխավոր դատախազությունը պահանջել է կախաղանի միջոցով մահապատժի ենթարկել երկրի նախկին նախագահ Հոսնի Մուբարաքին, ՆԳ նախարարության նախկին ղեկավար Հաբիբ Ալ-Ադլիին և նրա վեց տեղակալներին: Այս մասին հայտնում է եգիպտական МЕНА գործակալությունը:

Հոսնի Մուբարաքը և Եգիպտոսի ՆԳ նախարարության նախկին ղեկավարը մեղադրվում են 2011 թվականի սկզբին ժողովրդական հուզումների ժամանակ խաղաղ ցուցարարների վրա կրակ բացելու համար:

Հինգշաբթի օրը շարունակվել են Եգիպտոսի նախկին ղեկավարության գործով դատական լսումները, որտեղ հիմնականում ելույթ են ունեցել Եգիպտոսի գլխավոր դատախազության ներկայացուցիչները:

Դատախազության կարծիքով` Եգիպտոսի նախկին նախագահը մեղավոր է մարդկանց մահվան մեջ, չնայած` դեռ ապացույցներ չկան, որ Մուբարաքն է հրաման տվել զենք կիրառել ցուցարարների դեմ:

Գլխավոր դատախազության ներկայացուցիչ Մուստաֆա Սուլեյմանն ասել է, թե նախագահն է պատասխանատու ժողովրդի պաշտպանության համար, այդ իսկ պատճառով խնդիրն այստեղ այն չէ, թե արդյոք նա հրաման տվել է կրակ բացել ցուցարարների վրա, թե ոչ:

«Անհրաժեշտ է ճշտել` ինչո՞ւ նա չի միջամտել բռնությունը դադարեցնելու համար, քանի որ երկրի ղեկավարն անհնար է, որ չիմանար ցույցերի մասին, որոնք բռնկվել էին հունվարի 25-ին Եգիպտոսի որոշ մարզերում», – ասել է գլխավոր դատախազության ներկայացուցիչը: