Պայթյունների հետևանքով Իրաքում 60-ից ավելի մարդ է զոհվել

Առնվազն 68 մարդ է զոհվել, իսկ հարյուրավորները ստացել տարբեր աստիճանի վնասվածքներ Իրաքի հարավում և Բաղդադում տեղի ունեցած պայթյունների հետևանքով։ Այս մասին է հայտնում Agence France-Presse։

Հինգշաբթի օրը՝ հունվարի 5-ին, մահապարտ–ահաբեկիչը պայթեցրել է իրեն Էն–Նասիրիա քաղաքի ծայրամասում։ Արդյունքում 45 հավատացյալ շիաներ են մահացել, իսկ ևս 68 մարդ՝ վիրավորվել։ Միևնույն ժամանակ ևս 5 պայթյուններ են տեղի ունեցել Բաղդադի շիաբնակ թաղամասերում, որի արդյունքում առնվազն 23 մարդ է զոհվել, տասնյակ մարդիկ էլ՝ վիրավորվել։ Պայթուցիկների մի մասը տեղադրված է եղել ավտոմեքենաներում։ Դեռևս ոչ ոք չի վերցրել իր վրա պատասխանատվությունը այս պայթյունների կազմակերպման համար։

Պայթյունները հիմնականում կարելի է դիտարկել Իրաքի սուննի փոխնախագահի ու փոխվարչապետի և շիա վարչապետի միջև ծավալվող լարվածության ենթատեքստում։ Մյուս կողմից մտավախություն կա, որ Իրաքից ամերիկյան զորքերի դուրսբերումը կարող է իրաքյան շիաների ու սուննիների միջև առկա հինավուրց լարվածությունը վերածել կրոնական պատերազմի։