Ինչու չի կասեցվել որեւէ սննդամթերքի իրացումը՝ Սյունիքում ողբերգական թունավորման դեպքից հետո. Պարզաբանում է ՍԱՏՄ-ն

Ողբերգական թունավորման դեպքից հետո որեւէ տնտեսվարողի գործունեություն չի սահմանափակվել. Առայժմ նմուշներ են վերցրել՝ թունավորման պատճառները պարզելու համար։

Ոստիկանության ու Առողջապահության նախարարության աշխատանկիցները փորձաքննության համար սննդամթերքի նմուշներ վերցրել են թունավորված քաղաքացիների տանից, իսկ Սննդի անվտանգության տեսչական մարմնի աշխատակիցները՝ երկու տնտեսվարողների մոտ վաճառվող ապրանքներից։

ՍԱՏՄ-ի մամուլի քարտուղար Անուշ Հարությունյանի փոխանցմամբ՝ Սյունիքի տարածքային կենտրոնի աշխատակիցները ճշտել են, թե որ խանութներից են գնումներ կատարել հուլիսի 5-ին Սյունիքի մարզում «սուր էկզոգեն թունավորմամբ» բուժհաստատություն տեղափոխված ընտանիքի չափահաս անդամները, ի՞նչ սննդատեսակներ են գնել, ի՞նչ սննդամթերքից է սնունդ պատրաստվել այդ օրը, օգտագործե՞լ են արդյոք պահածոներ։

Նրա փոխանցմամբ՝ տեսչական մարմնի իրավասության ներքո իրավաբանական անձիք են՝ խանութները, վաճառքի կետերը, եւ իրենց աշխատակիցները նմուշառման համար Սյունիքի երկու տնտեսվարողներից, որտեղից ընտանիքը գնումներ է կատարել, նմուշառումներ են արվել՝ հետազոտության համար։

«Մինչև չլինեն համալիր լաբորատոր ստուգումների արդյունքները, չենք կարող հստակ ասել, թե թունավորումը կոնկրետ ի՞նչ սննդամթերքի հետեւանքով է տեղի ունեցել»,- ասաց Ա. Հարությունյանը՝ նշելով, որ այս պահին որեւէ սննդամթերքի իրացման նկատմամբ արգելք չի սահմանվել, ժամանակավորապես կասեցնելու որոշում չի կայացվել, քանի որ դեպքը մեկ ընտանիքի հետ է տեղի ունեցել, իսկ այդ խանութներից ու դրանցում վաճառվող սննդամթերքից օգտվում են, բազմաթիվ այլ քաղաքացիներ, եւ ահազանգեր չեն եղել։

«Ծանր դեպք է, իհարկե, 4 ամյա երեխա է մահացել, բայց մասնագետները չեն բացառում, որ տվյալ տան սննդամթերքի պահման պայմանները պատճառ դարձած լինեն, կամ ընտանիքը սեփական արտադրության պահածո օգտագործած լինի», - ասաց Անուշ Հարությունյանը։