Վրաստանում «Մայդան» չի կարող լինել. Կոբախիձե

Ուզում եմ բոլորին ասել, որ Վրաստանում «Մայդան» չի կարող լինել։ Ամենից շատ մենք պետք է պաշտպանենք երկրի անկախությունը, քանի որ ոչ ոք պատասխանատվություն չի կրելու Վրաստանի շահերի պաշտպանության համար»,- լրագրողների հետ զրույցում ասել է Վրաստանի վարչապետ Իրակլի Կոբախիձեն, հաղորդում են միջազգային ԶԼՄ-ները։

«Ուզում եմ հիշեցնել, թե ինչ արդյունքներ ունեցավ «Մայդանը» Ուկրաինայի համար։ Հետո Ուկրաինայի իշխանությունը փաստացի նշանակվեց դրսից՝ սկզբում մեկ անգամ, հետո՝ հաջորդ անգամ, և ի վերջո դրսից իշխանություն նշանակողը պատասխանատվություն չկրեց Ուկրաինայում ապագայում ծավալվող իրադարձությունների համար։ Մինչև 2013 թվականը Ուկրաինան տարածքային ամբողջականությամբ պետություն էր՝ 200 միլիարդ դոլարի տնտեսությամբ, իսկ այսօր երկիրը փլուզվել է, այսքան տարի երկրի տնտեսությունը որակապես անկում է ապրել, երկրի տարածքների 20%-ը օկուպացված է, տասնյակ հազարավոր մարդիկ զոհվել են, և ո՞վ է պատասխանատվություն կրելու դրա համար: Սրա համար ոչ ոք պատասխանատվություն չի կրում։ Ըստ այդմ, ամենից շատ մենք պետք է պաշտպանենք երկրի անկախությունը, քանի որ ոչ ոք պատասխանատվություն չի կրելու Վրաստանի շահերի պաշտպանության համար։ Դա մեզ լավագույնս ցույց տվեց Ուկրաինայի օրինակը, ուստի մենք պետք է հոգ տանենք մեր երկրի, պետության անկախության մասին»,- ասել է Կոբախիձեն։