Ջորջ Սորոս. «ԵՄ-ի փլուզումը կատաստրոֆիկ ազդեցություն կարող է ունենալ աշխարհի համար»

''Եվրոպական Միության փլուզումը և եվրոյի վերացումը կատաստրոֆիկ հետևանքներ կթողնի ամբողջ աշխարհի ֆինանսա-տնտեսական համակարգի վրա'', - ասել է միլիարդատեր Ջորջ Սորոսը: Այս մասին հաղորդում է Reuters լրատվական գործակալությունը: 

«Այսօր, եվրոն պոտենցիալ սպառնալիք է ներկայացնում ԵՄ անդամ երկրների քաղաքական համախմբվածության և կայունության հարցում», - ''Business Line'' թերթը մեջբերել է Սորոսի խոսքերը, ով իր այդ հայտարարությունն արել է Հնդկաստանի հարավում գտնվող Հայբերաբադ քաղաքում անցկացվող տնտեսական ֆորումի ժամանակ:  

«Եթե ԵՄ-ի միասնական արժույթը վերացվի, ապա դա կհանգեցնի Եվրոպական միության փլուզմանը, ինչն աղետալի հետևանքներ կթողնի ոչ միայն Եվրոպայի, այլև համաշխարհային ֆինանսական համակարգի վրա: Եվրոգոտու ֆինանսական ճգնաժամն ավելի լուրջ եւ ավելի վտանգավոր է քան 2008 թվականի տնտեսական ճգնաժամը: Մոտ ապագայում, եվրոգոտու որոշ երկրներ կարող են ավելի խիստ միջոցառումներ անցկացնել տնտեսության մեջ վարկառուի և պարտապանի միջև դիսբալանսը կարգավորելու համար: Ցավոք ԵՄ երկրները դեռ չեն լուծել ֆինանսական ճգնաժամից դուրս գալու խնդիրները, և դա է իրավիճակի վատթարացման պատճառը... և հայտնի էլ  չէ, թե երբ է այն լուծում ստանալու», - ավելացրել է Սորոսը: