Ժանաոզենը չի մասնակցի Ղազախստանի խորհրդարանական ընտրություններին

Ղազախստանի Սահմանադրական խորհրդի նախագահ Իգոր Ռոգովը հայտնել է, որ Ժանաոզեն քաղաքում, որտեղ տեղի են ունեցել անկարգությունները, չեն անցկացվելու խորհրդարանական ընտրություններ։ Այս մասին հունվարի 6-ին հայտնել է "Новости-Казахстан" գործակալությունը։

«Մեզ հարցում է արել ԿԸՀ–ն, թե արդյոք հնարավոր է Ժանաոզենում ընտրություններ անցկացնել, որտեղ մտցված է արտակարգ դրություն։ Սահմանադրական խորհուրդը պատասխանել է այդ հարցմանը՝ նշելով, որ քանի գործում է արտակարգ դրության ռեժիմը, ընտրություններ այդ քաղաքում հնարավոր չէ անցկացնել», – ասել է Ռոգովը։ Նա հիշեցրել է նաև, որ արտակարգ դրության պայմաններում քաղաքացիների որոշ իրավունքներ սահմանափակվում են։

Հիշեցնենք, որ Ժանաոզեն քաղաքում անցած տարվա դեկտեմբերի 16-ին խաղաղ ցույցը վերածվել էր անկարգությունների, որի հետևանքով 16 մարդ էր մահացել՝ պաշտոնական տվյալներով։ Դեկտեմբերի 17-ին քաղաքում մտցվել է արտակարգ դրություն, որով սահմանափակվել է ԶԼՄ–ների աշխատանքը, արգելվել են ցույցերը, գործադուլները և հավաքները։ Այն տևելու է մինչև հունվարի վերջ։