Արագածոտնի Թեմը հարստացավ նոր սպասավորներով, որ պիտի ծառայեն հավատավոր ժողովրդին

Հովհաննավանք վանական համալիրում, այսօր ձեռամբ Արագածոտնի Թեմի Առաջնորդ Գերաշնորհ Տեր Մկրտիչ եպիսկոպոս Պռոշյանի, մասնակցությամբ Թեմի հոգևոր դասի և աղոթակցությամբ Ղազարավանի մենաստանի միանձնուհիների, Հովհաննավանք վանական համալիրում տեղի ունեցավ Դպրական ձեռնադրություն:

Դպրական կոչման արժանանացան Արագածոտնի թեմի՝ Տեղերի, Օշականի, Ապարանի, Մուղնու, Բյուրականի, Աշտարակի, Հովհաննավանքի, Թալինի և Կոշի հովվություններում իրենց նվիրյալ ծառայությունը բերող 25 սպասավորներ:

Սրբազան Հայրը հավարտ արարողության շնորհավորեց ներկաներին Դպրական կոչում ստանալու առթիվ և հավելեց. «Ամենքիդ շնորհավորում եմ, այսուհետ Արագածոտնի Թեմը հարստացավ նոր սպասավորներով, ովքեր իրենց բարի գործերով ու իրենց մաքուր սրտով պետք է ծառայեն մեր հավատավոր ժողովրդին:

Մենք այս եկեղեցու ծառաներն ենք, մենք այս եկեղեցու սպասավորներն ենք ու մեր սպասավորությունը Աստվածային օրհնություն ունի իր մեջ, որովհետև ժառանգաբար առաքյալներից մինչև այսօր փոխանցվել է մեզ այս ծառայության շնորհն ու պարգևը:

Հաստատուն մնացեք Ձեր հավատքի մեջ, ձեր կյանքի մեջ բարի գործերը շատացրեք, Աստծո պատվիրանների համաձայն ապրեք, որպեսզի կարողանանք ծառայել մեր հայրենիքին մեր ժողովրդին և մեր Աստծուն: Աստծո օրհնությունը, սերը, խաղաղությունը թող լինի ձեր և ձեր ընտանիքների հետ: Այժմ և միշտ և հավիտյանս հավիտենից ամեն»: