Նիգերիայում ահաբեկչությունների հետևանքով ավելի քան 20 մարդ է զոհվել

Ինչպես այսօր՝ հունվարի 7-ին, հաղորդում է "BBC News"-ը, անցած օրերին Նիգերիայում տեղի ունեցած ահաբեկչությունների հետևանքով ավելի քան 20 մարդ է զոհվել։ Զոհերի մասին տվյալները և ահաբեկչությունների թիվը դեռևս պարզվում են։ Ականատեսների խոսքերով՝ 17 մարդ է սպանվել Մուբի քաղաքում՝ երեկ՝ հունվարի 6-ին։ Զինյալների գործողությունների զոհ են դարձել իգբո ցեղի ներկայացուցիչները, որոնք հիմնականում քրիստոնեություն են քարոզում։ Միևնույն ժամանակ ոստիկանությունը հայտնում է 12 զոհերի մասին։

"Agence France-Presse"-ի տվյալներով, երեկ 6 մարդ է զոհվել Նիգերիայի Յոլ քաղաքում քրիստոնեական եկեղեցու վրա հարձակման արդյունքում։

Հունվարի 5-ի երեկոյան 6 մարդ էր զոհվել Գոմբե քաղաքում կրկին քրիստոնեական եկեղեցու վրա կատարված հարձակման արդյունքում։ Մուբի և Գոմբե քաղաքներում իրականացված ահաբեկչությունների պատասխանատվությունը իր վրա է վերցրել ծայրահեղ իսլամիստական «Բոկո Հարամ» խմբավորումը։