Ցեղասպանության մասին դասանյութը հիստերիայի մեջ է գցել Թուրքիային

Անկարայի Շառլ դը Գոլի անվան ֆրանսիական լիցեյի պատմության դասագրքում Հայոց ցեղասպանության մասին դասանյութի առկայությունը հերթական անգամ հիստերիայի մեջ է գցել թուրքերին:

Ֆրանսիական միջնակարգ դպրոցի երկրորդ դասարանում, որտեղ սովորում են նաև թուրք աշակերտներ, «Հայոց ցեղասպանությունը (1915-1916)» վերնագրով բաժնում ներկայացվում է Ցեղասպանության պատմությունը. տեղեկացնում է «Արմենպրես»-ը՝ հղում անելով թուրքական StarGazete-ին:

Պատմության դասագրքում ասվում է. «Երիտթուրքական կառավարությունը որոշում ընդունեց վերացնել կայսրության հայերին: Այսպես սկսվեց շուրջ 1 միլիոն հայերի սպանդը՝ 20-րդ դարի առաջին ցեղասպանությունը»: Գրքում խոսվում է այն մասին, որ նախքան Ցեղասպանությունը հայերի թիվը հասնում էր երկու միլիոնի: Խոսելով երիտթուրքական «Իթթիհաթ վե թերաքքի» («Միություն և առաջադիմություն») կուսակցության մասին՝ գրքում շեշտվում է, որ կուսակցության ղեկավարները տարբեր գաղտնի ժողովներ էին իրականացրել՝ ծրագրավորելով Ցեղասպանությունը:

Թուրքական «Ազգայնական շարժում» ազգայնամոլ կուսակցության պատգամավոր Օզջան Յենիչերին գրքի կապակցությամբ իր բողոքն է հայտնել Թուրքիայի ազգային կրթության նախարար Օմեր Դինչերին: Նա իր դիմում-բողոքում հետաքրքրվել է, թե ով է թույլատրել նման գրքով Թուրքիայում դասավանդման իրավունքը: «Եթե տեղյակ եք գրքի գոյության մասին, ինչո՞ւ ոչինչ չեք ձեռնարկում»,-դիմելով կրթության նախարարին՝ հայտարարել է ազգայնական կուսակցության պատգամավորը: