Գիտության լրագրության մրցույթի մասին

Ինչպես հայտնի է, մի խումբ գիտնական-ակտիվիստների կողմից հիմնադրված «Պահանջում ենք գիտության ֆինանսավորման ավելացում» facebook-յան նախաձեռնությունը, համագործակցելով սկզբում «Գագիկ Ծառուկյան», իսկ ապա' «Տաշիր» հիմնադրամների հետ, արդեն երեք անգամ կազմակերպել է գիտական լրագրության մրցույթ, որի նպատակն է խրախուսել գիտության մասին գրող (խոսող) լրագրողներին:
Թեև մրցույթները ժամանակի ընթացքում մի քիչ փոխեցին իրենց ուղղությունը և գիտության մասին տպելու փոխարեն ստիպեցին լրագրողներին տպել գիտության մենեջմենթի և հարակից հարցերի շուրջ: Դա, համոզված եմ, այդքան էլ ճիշտ չէ, քանի որ գիտության մենեջմենթի մասին լուսաբանումները պետք են չինովնիկների համար, բայց շատ ավելի կարևոր է հենց գիտության ու դրա ձեռքբերումների մասին լուսաբանումները, քանի որ հենց այդպես է ձևավորվում հասարակական կարծիքը գիտության մասին:

Այսինքն, իմ համոզմամբ, շատ ավելի կարևոր է ազդել գիտության և գիտնականների մասին հանրային կարծիքի վրա, քան չինովնիկներին ապացուցել, որ պետք է ավելացնել գիտության ֆինանսավորումը, քանի որ չինովնիկները դա գիտակցում են, բայց չեն անում:
Սակայն նշված խնդրից ավելի կարևոր է գիտության լրագրության ֆինանսական աջակցության ուղիները: Գործող և նախորդ ծրագրերում, ինչպես նշվեց, ֆինանսավորումը տրվում է անմիջապես լրագրողներին, ովքեր մրցույթին նախորդող ինչ-որ ժամանակահատվածում (մոտ կես տարի) գիտության մենեջմենթի մասին հրապարակումներ են ունեցել:

Համոզված եմ, որ ավելի նպատակահարմար կլինի, եթե ֆինանսավորումը տրվի խմբագրություններին' ինչ-որ ժամանակահատվածում ինչ-որ քանակությամբ/պարբերականությամբ գիտության մասին լուսաբանումներ կատարելու պարտականության դիմաց, քանի որ այս դեպքում լուսաբանումները կլինեն ավելի կանոնակարգված, պրոֆեսիոնալ և օբյեկտիվ:

Այսինքն, հայտարարվում է մրցույթ' գիտության մասին հրապարակումներ իրականացնելու: Մրցույթին մասնակցում են խմբագրությունները, որոնք ներկայացնում են առաջարկներ նյութերի քանակի, թեմաների և որակի (բազմակողմանիություն, օբյեկտիվություն, բացառիկություն) մասին: Ֆինանսավորումը տրվում է ամենալավ առաջարկներին' հաշվի առնելով առաջարկող ԶԼՄ-ի ընթերցումների/դիտումների քանակը և հեղինակությունը:

Որևէ կասկածից վեր է, որ ֆինանսների ուղղորդման այսպիսի տարբերակը ավելի քաղաքակիրթ է և միարժեքորեն առավել ադյունավետ: Հուսով եմ, որ «Պահանջում ենք գիտության ֆինանսավորման ավելացում» նախաձեռնության ներկայացուցիչները այսուհետ հիմնադրամներին հենց այսպիսի ծրագրի առաջարկով կներկայանան և համոզված եմ, որ հիմնադրամները կընդունեն այն:

Դանիել Իոաննիսյան