Այսօր Վիկ Դարչինյանի ծննդյան օրն է

Այսօր Վախթանգ (Վիկ) Ռուբենի Դարչինյանը նշում է ծննդյան 36-ամյակը: Աշխարհահռչակ հայ պրոֆեսիոնալ բռնցքամարտիկը ծնվել է 1976 թվականի հունվարի 7-ին Լոռու մարզի Վանաձոր քաղաքում:

Վախթանգը բռնցքամարտով զբաղվել է 8 տարեկանից: Նրա առաջին և միակ մարզիչը Վազգեն Բադալյանն է, ում գլխավորությամբ հաղթել է Հայաստանի մինչև 12, 13, 14, 15 և 16 տարեկանների առաջնություններում:

1993 թ. Դարչինյանն առաջին անգամ հանդես է եկել աշխարհի առաջնությունում և գրավել 5-րդ տեղը:

1994 թվականին Դարչինյանը մեկնում է Ռուսաստան և այդ երկրի դրոշի ներքո մասնակցում է 10-ից ավելի մրցաշարերի: 96-97թթ. Վիկը ներկայացնում է Ուկրաինան և մասնակցում 8 մրցաշարի:

1997թ. կրկին վերադառնում է Հայաստան և 1998 թվականին Հայաստանի դրոշի ներքո հաղթում է Եվրոպայի գավաթն ու նվաճում աշխարհի առաջնության բրոնզե մեդալը: 1999թ. նա կրկին ուժեղագույնն է ճանաչվում Եվրոպայում: Նույն տարում ԱՄՆ-ում կայացած աշխարհի առաջնության ժամանակ նա գրավում է պրոֆեսիոնալ բռնցքամարտի ամերիկացի պրոմոութերների ուշադրությունը, սակայն Վախթանգը հրաժարվում է պայմանագիր կնքել նրանց հետ. նա երազում էր 2000թ. օլիմպիական խաղերում ներկայացնել Հայաստանը: Վիկն իրականացրեց երազանքն ու Սիդնեյի օլիմպիական խաղերում հասավ մինչև քառորդ եզրափակիչ:

Վախթանգը պրոֆեսիոնալ բռնցքամարտիկի կարիերան սկսել է Ավստրալիայում 2000 թվականին: Սիդնեյում նա տպավորել էր Ջեֆ Ֆենեչին, ում առաջարկով էլ տեղափոխվեց պրոֆեսիոնալ ռինգ:

Մինչև 2007թ. Վիկը մասնակցում է 28 մարտի և 28 հաղթանակ տանում, որոնցից 22-ը նոկաուտով: Այդ ընթացքում նվաճում է IBF և IBO չեմպիոնական գոտիները և մի քանի անգամ պաշտպանում դրանք: 2007թ. Դարչինյանն իր առաջին պարտությունն է կրում` չեմպիոնական գոտիները զիջելով ֆիլիպինցի Նոնիտո Դոներին:

2008 թ. դեկտեմբերի 1-ին և 2009 թ. փետրվարի 7-ին Դարչինյանը տանում է իր կարևորագույն հաղթանակներից 2-ը: Նախ մեքսիկացի Քրիստիան Միխարեսին պարտության մատնելով` նա նվաճում է թեթևագույն քաշային կարգի 3 չեմպիոնական գոտիները՝ WBA, IBA WBC , ապա՝ պաշտպանում դրանք Խորխե Արսեի հետ մենամարտում:

2011 թվականի սեպտեմբերի 3-ին իրականություն դարձավ Վախթանագ Դարչինյանի երազանքը` նա ռինգ դուրս եկավ Հայաստանում` Երևանի Կարեն Դեմիրճյանի անվան մարզահամերգային համալիրում, որտեղ պարտության մատնեց ՀԱՀ ներկայացուցիչ Էվանս Մբամբային: