«Հայ ժողովուրդը միայնակ չէ». «DurDe» կազմակերպություն

Թուրքիայում գործող «DurDe» («Ասա՝ վերջ ցեղապաշտությանը և ազգայնամոլությանը») կազմակերպությունը հանդես է եկել պաշտոնական հայտարարությամբ՝ «Հայկական անհիմն պնդումների դեմ պայքարի միության» /ASİM-DER/ (Uluslararası Asılsız Ermeni İddialarıyla Mücadele Derneği) նախագահ Գոքսել Գյուլբեյի հայատյաց գործողությունների առնչությամբ: «DurDe»-ն հայտարարել է Գյոքսել Գյուլբեյի և «Հայկական անհիմն պնդումների դեմ պայքարի միության» դեմ դատական գործ հարուցելու իր մտադրության մասին: Այդ մասին հաղորդում է Akunq.net-ը՝ հիմնվելով «DurDe» («Ասա՝ վերջ ցեղապաշտությանը և ազգայնամոլությանը») կազմակերպության պաշտոնական կայքում հրապարակված տեղեկության վրա:

Ըստ աղբյուրի՝ «DurDe» կազմակերպության տարածած հայտարարության մեջ մասնավորապես նշվում է հետևյալը. «Ադրբեջանի կողմից մեծ աջակցություն ստացող ASİM-DER (Uluslararası Asılsız Ermeni İddialarıyla Mücadele Derneği) կազմակերպության նախագահ Գյոքսել Գյուլբեյը նոյեմբերի 24-ին, 25-ին և 26-ին Twitter-ի իր անձնական էջում տեղեկություններ է տարածել Թուրքիայում գործող հայկական դպրոցների, եկեղեցիների և հիմնադրամների հասցեների ու հեռախոսահամարների վերաբերյալ՝ այդպիսով թիրախ դարձնելով դրանք: Նա հայերի օրինական կրթօջախներն ու պաշտամունքի վայրերն անվանել է «հայկական կազմավորումներ», իսկ իրեն Twitter-ի միջոցով պատասխանած հայերի դեմ սպառնալիքներ տեղացել:

Այս մութ անձնավորությունը նախկինում էլ էր հայերի դեմ ուղղված նախաձեռնություններով հանդես եկել: Գյուլբեյն ասել է, թե ներկայում գործում է ընդհանուր 57 վաքըֆ (հիմնադրամ), շատ մեծ է համարել այդ թիվը և իր բողոքն արտահայտել Ներքին գործերի նախարարությանը՝ նշելով. «Մի՞թե այդչափ հայկական «վաքըֆ»-ների կարիք կա»:

Դրանից առաջ էլ Գյոքսել Գյուլբեյն ու ASİM-DER-ի մյուս ղեկավարները «մահապատժի էին ենթարկել» Հայաստանի նախագահ Սերժ Սարգսյանի նկարը: Միաժամանակ ցուցադրել էին 2004 թ. Գուրգեն Մարգարյան անունով հայ զինվորին գիշերը՝ քնած ժամանակ կացնով գլխատած ադրբեջանցի զինվոր Ռամիլ Սաֆարովի ցուցապաստառները:

Այդ գործողությունների դեմ իրենց բողոքն էին արտահայտել հայ մտավորականները:

Մենք գիտենք, որ նման՝ թիրախ մատնանշող գործողությունները հղի են ահավոր հետևանքներով՝ ընդհուպ մինչև կոտորած: Մենք թույլ չենք տա նմանատիպ ցեղապաշտական նախաձեռնությունների:

Մենք դատական գործ ենք հարուցում հայերին թիրախ դարձրած Գյոքսել Գյուլբեյի և նրա կազմակերպության դեմ»: