Քուվեյթում մեկնարկել են արտահերթ խորհրդարանական ընտրություններ

Դեկտեմբերի 1-ին Քուվեյթում մեկնարկել են խորհրդարանական արտահերթ ընտրություններ, որոնք ընթանում են ընդդիմության զանգվածային ցույցերի և բոյկոտների ֆոնի վրա. հաղորդում է AFP-ն:

Երկրում գրանցված է 400 հազար ընտրող, ընտրության ձայնի իրավունք ունի 21 տարին լրացած յուրաքանչյուր քաղաքացի՝ բացի զինծառայողներից: Ընտրությունների արդյունքում ընտրվելու է Ազգային ժողովի 50 պատգամավոր: Խորհրդարանի անդամ է ձգտում դառնալ 307 քաղաքացի, որից 14-ը՝ կին: Սակայն ընդդիմությունը, որը հաղթանակ էր տարել նախորդ՝ 2012թ. փետրվարի ընտրություններում (այնուհետ խորհրդարանն ազատ էր արձակվել), բոյկոտում է ընտրությունները, որը նշանակում է, որ խորհրդարանի նոր կազմը լիովին կառավարամետ է լինելու:

Ընդդիմությունը հրաժարվել է մասնակցել ընտրություններին շեյխի կողմից ընդունած որոշումից հետո, որով մեկ քաղաքացուն թույլատրվում է քվեարկել միայն մեկ թեկնածուի օգտին, այդ դեպքում, երբ նախկինում քաղաքացին կարող էր իր ձայնը տալ միանգամից 4 թեկնածուի:

Ընդդիմությունը կարծում է, որ այս փոփոխությունը հակասում է սահմանադրությանը:

Ընտրությունների նախօրեին ընդդիմության կոչով մայրաքաղաք Էլ Քուվեյթի փողոցներում հայտնվել էին տասնյակ հազարավոր մարդիկ: Նրանք պահանջում են վերանայել կատարված փոփոխությունները և կոչ են անում բոյկոտել ընտրությունների անցկացումը: Ի տարբերություն նախորդ ցույցերի՝ այս ցույցը կառավարության կողմից արտոնագրվել է: