Ֆրանսիան կոչ է անում «շարունակել հայ-ադրբեջանական սահմանազատումը»

Ֆրանսիան ողջունում է մայիսի 10-ին և 11-ին Ալմաթիում Հայաստանի և Ադրբեջանի ԱԳ նախարարների միջև բանակցությունների նոր նստաշրջանի անցկացումը և կոչ է անում շարունակել հայ-ադրբեջանական սահմանազատումը։ Այս մասին ասվում է Ֆրանսիայի ԱԳՆ հաղորդագրության մեջ:

«Ֆրանսիան ընդգծում է 1991 թվականի Ալմաթիի հռչակագրին ու տարածքային ամբողջականության փոխադարձ ճանաչմանը Երևանի ու Բաքվի հավատարմությունը վերահաստատելու կարևորությունը՝ 2022 թվականի հոկտեմբերի 7-ին Պրահայում կայացած քառակողմ հանդիպմանը համապատասխան։ Փարիզը կոչ է անում այս համատեքստում շարունակել սահմանի սահմանազատումը 2024 թվականի ապրիլի 19-ի արձանագրության մեջ համաձայնեցված սկզբունքների հիման վրա: Միևնույն ժամանակ, կոչ ենք անում շարունակել քննարկումները՝ երկու երկրների միջև խաղաղության պայմանագրի ստորագրման նպատակով։ Մենք ողջունում ենք Ղազախստանի իշխանությունների նախաձեռնությունը՝ նպաստելու այդ բանակցությունների անցկացմանը։ Ֆրանսիան իր գործընկերների հետ կշարունակի աշխատել Հարավային Կովկասում արդար և կայուն խաղաղություն հաստատելու ուղղությամբ՝ միջազգային իրավունքին համապատասխան»,- ասվում է հաղորդագրության մեջ: