ՌԴ ՊՆ կադրերի վարչության պետին կաշառք տալու գործով հայ գործարար է ձերբակալվել

Մոսկվայի Բասմանի դատարանը քննչական մեկուսարան է ուղարկել ՌԴ ՊՆ կադրերի վարչության պետ Յուրի Կուզնեցովի քրեական գործով ենթադրյալ կաշառք տվող Լյովա Մարտիրոսյանին, գրում է ՏԱՍՍ-ը։

Կուզնեցովը Մարտիրոսյանի հետ անձամբ ծանոթ է եղել ՌԴ ԶՈՒ գլխավոր շտաբի 8-րդ տնօրինությունում նրա ծառայությունից։ Դատարանի որոշմամբ բավարարվել է նախաքննական մարմինների միջնորդությունը, և Մարտիրոսյանի նկատմամբ որպես խափանման միջոց է ընտրվել կալանավորումը մինչև հուլիսի 12-ը։

«Կուզնեցով Յուրին անձամբ առանձնապես խոշոր չափերով կաշառք է ստացել այն գործողությունների համար, որոնցով նա կարող է նպաստել իր պաշտոնական դիրքի, զբաղեցրած պաշտոնի նշանակության և հեղինակության, ինչպես նաև կաշառքի շահերից ելնելով ծառայության մեջ ընդհանուր հովանավորչության համար»,-ասվում է հաղորդագրության մեջ։

Ըստ քննիչների՝ Մարտիրոսյանը մեղադրվում է ՌԴ քրեական օրենսգրքի 291-րդ հոդվածի 5-րդ մասով նախատեսված հանցագործություն կատարելու մեջ (առանձնապես խոշոր չափերով կաշառք տալը)։

Ինչպես հայտնել ենք, ՌԴ իրավապահները խուզարկությունների ժամանակ ավելի քան 100 միլիոն ռուբլի են հայտնաբերել ՌԴ ՊՆ գլխավոր վարչության պետ Յուրի Կուզնեցովի տանը։ Կուզնեցովը մեղադրվում է Ռուսաստանի Դաշնության Քրեական օրենսգրքի 290-րդ հոդվածի 6-րդ մասով («Առանձնապես խոշոր չափերով կաշառք ստանալը»): Այս հոդվածով նրան սպառնում է մինչև 15 տարվա ազատազրկում։