Իրանը հարևաններին համատեղ զորավարժություններ է առաջարկել

Իրանի ռազմածովային ուժերի հրամանատար Հաբիբոլա Սայարին հայտարարել է, որ Իրանը պատրաստ է համատեղ զորավարժություններ անցկացնել Մերձավոր Արևելքի հարևան երկրների հետ։

Սայարին ասել է, որ Իրանի ռազմական ներուժն ու հնարավորություններն ավելի մեծ են, քան իր հարևաններինը, սակայն կարևորը տարածաշրջանի երկրների միջև համագործակցությունն է, որն անհրաժեշտ է անվտանգության ապահովման նկատառումներով։

Ռազմածովային ուժերի հրամանատարը հայտարարել է, որ Իրանի ռազմածովային ուժերը Հորմուզի նեղուցում զորավարժություններ են անցկացրել՝ փորձարկելով սպառազինության նոր տեսակներ։ «Վելայեթ-90» կոչված զորավարժությունները հաջող ընթացք և ավարտ են ունեցել։ 

Իրանը երեկ զորավարժություններ է սկսել նաև Աֆղանստանի հետ սահմանի մոտակայքում։ Իրանի իսլամական հեղափոխության պահապանների կորպուսի ցամաքային ուժերի զորավարժությունների ամենաակտիվ փուլը լինելու է վաղը։