Հայտնի է Եգիպտոսում սահմանադրական հանրաքվեի օրը

Եգիպտոսի սահմանդրական նախագծի շուրջ հանրաքվեն տեղի կունենա դեկտեմբերի 15-ին: Այդ մասին շաբաթ երեկոյան հայտարարել է Եգիպտոսի նախագահ Մուհամմեդ Մուրսին. փոխանցում է Reuters-ը:

Եգիպտոսի սահմանադրական ասամբլեան Սահմանադրության տեքստի վրա իր աշխատանքներն ավարտել էր նախօրեին և փաստաթուղթը փոխանցվել էր նախագահի հաստատմանը: Հայտարարելով հանրաքվեի օրը՝ նախագահ Մուրսին կոչ է արել քաղաքացիներին գալ և քվեարկել:

Նոր սահմանադրությունը պլանավորում է պահպանել դրույթներն այն մասին, որ իսլամը պետության կրոնն է հանդիսանում, իսկ շարիաթը երկրի հիմնական օրենսդրական աղբյուրն է:

Հիշեցնենք, որ նոր Սահմանադրությունը հաստատվել էր Սահմանադրական ասամբլեայի կողմից նոյեմբերի 30-ին, ինչը զանգվածային ցույցերի էր հանգեցրել երկրում: ՄԱԿ-ի մարդու իրավունքների պաշտպանության հանձնակատար Նավի Փիլայը դիմել էր Եգիպտոսի առաջնորդին, որտեղ զգուշացրել էր նրան, որ նմանօրինակ պայմաններում սահմանադրության ընդունումը կարող է հանգեցնել երկրի պառակտմանը:

Նոր սահմանադրությունը մասնավորապես սահմանում է, որ Եգիպտոսի նախագահը կարող է 2 անգամ անընդմեջ 4 տարի ժամկետով մնալ նախագահի պաշտոնում: Երկրում ստեղծվելու է անվտանգության ազգային խորհուրդ նախագահի ղեկավարությամբ, որտեղ տեղ են գտնելու միայն կառավարամետ դեմքեր: