Hurriyet. Քեմալ Աթաթուրքը սիրավեպ է ունեցել հայուհու հետ

«Հերոսի տխուր սերը» գրքի հեղինակ Նեհիր Ռոգենդորֆ Էյուբոգլուն (Nehir Roggendorf Eyüboğlu) Hurriyet-ին տված հարցազրույցում պատմել է Թուրքիայի Հանրապետության հիմնադիր Քեմալ Աթաթուրքի՝ հայուհու նկատմամբ սիրո մասին. փոխանցում է novostink.ru-ն:

Նշենք, որ Նեհիր Ռոգենդորֆ Էյուբոգլուն ինժեներ-շինարար է, նախկինում ապրել է Գերմանիայում, իսկ այժմ՝ Թուրքիայում, չորս գրքի և չորս պիեսի հեղինակ է: Պարբերականին տված հարցազրույցում նա ասել է, որ անձամբ է ծանոթ է եղել վեպի հերոսուհու՝ Հերմինե անունով հայուհու հետ, ով և 17 տարի առաջ պատմել է իրեն այս պատմությունը:

Հերմինեն պատմել է, որ հանդիպել է Աթաթուրքին 1929 թվականին ընդունելության ժամանակ, որտեղ Աթաթուրքն առաջին իսկ հայացքից գերվել է նրանով և հրավիրել իր նստավայրը՝ Դոլմաբածչե: Ըստ գրքի հեղինակի՝ Հերմինե նույնպես անտարբեր չէր նրա նկատմամբ, և նրանք սկսել են հանդիպել:

Սիրավեպը ամուսնությամբ չի ավարտվել երկու պատճառով՝ առաջին հերթին՝ տարիքային մեծ տարբերության, երկրորդ՝ Աթաթուրքը ասել է, որ ամուսնությունն իր համար չէ, քանի որ նա իրեն նվիրել է թուրք ժողովրդին:

Ըստ Էյուբոգլույի՝ Աթաթուրքը ժամանակին ասել է Հերմինեին. «Ինձ համար միևնույն է՝ դու հայ ես, հույն, թե՝ ռուս: Ես տեսա քեզ և առաջին հայացքից հասկացա, որ դու թուրք չես: Դու մի ծաղիկ ես, որը դեռ պիտի հասունանա: Ես քեզ շատ սիրեցի»:

Գրքի հեղինակը նշել է, որ մի անգամ, երբ Աթաթուրքը հերթական անգամ իր մոտ էր կանչել Հերմինեին, նրանց հանդիպմանը խանգարել է վարչապետ Իսմեթ Ինոնյուն: Դրանից հետո Հերմինեին երբեք էլ չհաջողվեց տեսնել Աթաթուրքին:

Գրքի հեղինակը պնդում է, որ իր գրքում ներկայացված պատմությունը լիովին համապատասխանում է իրականությանը: Սակայն հայտնի լրագրող Թահա Աքյոլը, Աթաթուրքի մասին գրքերի հեղինակ Ագուզ Աքայը և Սինան Մեյդանը հայտարարել են, որ չունեն նման տեղեկություններ և պատմության իսկությունը ապացուցված չէ: