Ֆրանսիայի Ազգային ժողովի կողմից ընդունված հայկական օրինագիծը հունվարի 23-ից 31-ը կհայտնվի Սենատի օրակարգում

Ֆրանսիայում Թուրքիայի դեսպան Թահսին Բուրջուօղլուի Փարիզ վերադառնալուն պես, Նիկոլա Սարկոզին անցավ նոր քայլերի։ Ֆրանսիայի նախագահը ցանկանում է Հայոց ցեղասպանության ժխտումը քրեականացնող օրինագիծը տարածել Եվրամիության բոլոր երկրներում։

Այս մասին է գրում թուրքական Hurriyet-ը։

«Ֆրանսիայի Ազգային ժողովի կողմից ընդունված հայկական օրինագիծը հավանաբար հունվարի 23-31-ին կհայտնվի Սենատի օրակարգում։ Սարկոզին նույնիսկ դրան չսպասելով՝ Թուրքիայի ԵՄ անդամակցությանը խանգարող մեկ այլ որոշում է ընդունել։ Ֆրանսիան ցանկանում է ԵՄ-ի կողմից 2007-ին ընդունված «Ռասիզմի եւ այլատյացության դեմ պայքարի» շրջանակային համաձայնագրի մեջ ներառել հայկական օրինագիծը եւ Հայոց ցեղասպանության ժխտումը քրեականացնող օրինագիծը տարածել ԵՄ բոլոր երկրներում։

Եթե հայկական օրինագիծը հաստատվի Սենատում եւ ներառվի ԵՄ-ի շրջանակային համաձայնագրի մեջ, Հայոց ցեղասպանության ժխտողներին ԵՄ-ի երկրներում կսպառնա 1-3 տարի պատժաչափ»,- գրում է Hurriyet-ը։

Հայոց ցեղասպանության ժխտումը քրեականացնող օրինագիծը Ֆրանսիայի Ազգային Ժողովի կողմից ընդունվել է դեկտեմբերի 22-ի նիստում։ Դրա համաձայն՝ ցեղասպանության փաստը ժխտելու դեպքում, մեկ տարվա ազատազրկում եւ 45 հազար եվրո տուգանք է նախատեսվում: