2012 թ. կմեկնարկեն Սանահին վանական համալիրի մասնակի վերականգնման և ամրակայման աշխատանքները

Սանահին վանական համալիրի հետագա անխաթար պահպանության նպատակով ՀՀ մշակույթի նախարարությունը 2011 թ. շարունակել է իրականացնել համալիրի առանձին հուշարձաններում առկա խնդիրներին ուղղված մի շարք աշխատանքներ: Մասնավորապես,

ՀՀ մշակույթի նախարարության <<Պատմամշակութային ժառանգության գիտահետազոտական կենտրոն>> ՊՈԱԿ-ի և Բեռլինի բարձրագույն տեխնոլոգիաների համալսարանի համագործակցությամբ կատարվել են կառույցների տեխնիկական վիճակի ուսումնասիրություններ,

նախարարության հրավերով իտալացի մասնագետների կողմից իրականացվել է վանական համալիրի բոլոր հուշարձանների մանրամասն չափագրում,

պետական բյուջեի հաշվին իրականացվել են պահպանվածության առումով առավել վտանգված Սբ Ամենափրկիչ եկեղեցու հուշարձանամերձ տարածքի հնագիտական պեղումներ ու կառույցի ինժեներաերկրաբանական հետազոտություններ,

կազմվել են Սբ Ամենափրկիչ եկեղեցու և գավիթի, Սբ Աստվածածին եկեղեցու և գավիթի, Գրիգոր Մագիստրոսի ճեմարանի մասնակի ամրակայման, վերականգնման նախագծային առաջադրանքները: Իրականացվել է հուշարձանի վերականգնման համար պահանջվող նախագծանախահաշվային փաստաթղթերի կազմման և ձեռքբերման համար նախատեսված գնումների գործընթացը: 2011 թ. նոյեմբերին հաղթող կազմակերպության հետ արդեն իսկ կնքվել է համապատասխան պայմանագիր և վերջինիս են տրամադրվել կատարված բոլոր հետազոտությունների արդյունքները և նշված հուշարձանների մանրամասն չափագրությունները:

Անհրաժեշտ աշխատանքները կկատարվեն պետական բյուջեի հաշվին, որը նախատեսվում է ավարտել 2012 թ. մայիսին:

2012 թ. պետական բյուջեի հատկացումներով կմեկնարկեն մասնակի վերականգնման և ամրակայման աշխատանքները: Համապատասխան մասնագետները անհրաժեշտ լուծումներ կտան նաև բուսածածկի և տանիքների ջրամեկուսացման հետ կապված խնդիրներին: