Հուշակոթողը կվերականգնվի բարեգործական հիմնադրամի կողմից կատարվող ներդրումներով

Ի հավերժացումն 1827 թ. ռուս-պարսկական պատերազմի ժամանակ Օշական գյուղի մերձակայքում օգոստոսի 17-ին տեղի ունեցած «Օշականի ճակատամարտում» զոհված 1131 ռուս զինվորների հիշատակի` Էջմիածնից 4 կմ հեռավորության վրա դեռևս 1834 թ. կառուցվել է հուշակոթող, որը ընդգրկված է ՀՀ Արմավիրի մարզի պատմության և մշակույթի հուշարձանների պետական ցուցակում:

Հուշակոթողի անխաթար պահպանության նպատակով Հայաստանում Ռուսաստանի դեսպան Վյաչեսլավ Կովալենկոյի և ՀՀ մշակույթի նախարարության նախաձեռնությամբ նախորդ տարվա մարտ-ապրիլ ամիսներին կատարվել է հուշարձանի մասնակի վերականգնում և տարածքի բարեկարգում: Ներկայում նախարարության և «Հովհաննես Իմաստասեր Կաթողիկոս Օձնեցի» բարեգործական հիմնադրամի միջև 2011 թ. դեկտեմբերի 12-ին կնքված հուշագրի համաձայն, նախարարության կողմից պատվիրված նախագծով կիրականացվեն և ավարտին կհասցվեն հուշարձանում նախատեսված վերականգնողական աշխատանքները (հուշարձանի վերականգնում և հուշարձանամերձ տարածքի բարեկարգում):

Հիմնադրամն, ըստ պայմանավորվածության, ստանձնել է հուշակոթողում կատարվելիք վերականգնողական աշխատանքների ողջ ֆինանսավորումը, իսկ ՀՀ մշակույթի նախարարության մասնագետներն իրենց անմիջական մասնակցությամբ կապահովեն հուշարձանի վերականգնման գործընթացի կազմակերպման և իրականացման աշխատանքները: