ԱՄՆ–ի բարձրաստիճան պաշտոնյան հաքերական հարձակումների զոհ

«Stratfor» մասնավոր տեղեկատվական և հետազոտական ընկերության սերվերների վրա հաքերական հարձակումներից հետո ամերիկյան և բրիտանական մի շարք բարձրաստիճան պաշտոնյաների անձնական տվյալները հայտնվել են համացանցում։ Այս մասին հաղորդում է «The Guardian»–ը։

Հաքերների հարձակումների հետևանքով 850 հազ. մարդու անձնական տվյալներ դարձել է հանրության սեփականությունը, այդ թվում ԱՄՆ-ի նախկին պետքարտուղար Հենրի Քիսինջերի եւ նախկին փոխնախագահ Դեն Կուեյլայի էլեկտրոնային փոստի հասցեները։ Բացի այդ, հաքերական հարձակումների պատճառով հրապարակվել են ՆԱՏՕ-ի 242 և Մեծ Բրիտանիայի պաշտպանության նախարարության 221 բարձրաստիճան պաշտոնյաների անձնական տվյալները, ինչպես նաև պետական գործակալություններում աշխատող տասնյակ բրիտանացի աշխատակիցների, այդ թվում` 67 ոստիկանների տվյալները:

Հաքերների կողմից «Stratfor»–ի գաղտնազերծված անձնական տվյալների հիմնական մասը եղել է ընկերության հաճախորդների էլ. փոստի հասցեներն ու գաղտնաբառերը։ Սակայն, ինչպես հաղորդում է «The Guardian»–ը,  հաքերների կողմից գաղտնազերծվել է նաև 75 հազ. բանկային քարտերի կոդեր։ Դեկտեմբերի վերջին «Identify Finder» ընկերությունը հայտարարել էր, որ ավելի քան 50 հազ. կրեդիտ քարտերի կոդեր են գաղտնազերծվել հաքերների կողմից։

«Stratfor» ընկերության սերվերների վրա հաքերները հարձակում էին գործել 2011 թ–ի դեկտեմբերի 25–ին։ Հաքերները «Stratfor»–ի հաճախորդների բանկային հաշիվներից մոտ մեկ միլիոն դոլար են հանել և փոխանցել են բարեգործական հիմնադրամներին։  Ընկերության կայքը հաքերների հարձակումից հետո արգելափակվել է և մինչև այժմ անհասանելի է մնում։ 

Հունվարի 6–ին «Stratfor»–ի հիմնադիր եւ տնօրեն Ջորջ Ֆրիդմանը ընկերության «Facebook»–ի էջում գրել է, որ հաքերները [email protected] ինտերնետային հասցեից էլեկտրոնային նամակներ են ուղարկում ընկերության հաճախորդներին։ Նա ընդգծել է, որ այդ նամակներն ընկերության անունից չեն ուղարկվում և խնդրել է ընկերության հաճախորդներին չփոխանցել իրենց անձնական տվյալները։ 

«Stratfor» կամ «Strategic Forecasting» ամերիկյան մասնավոր ընկերությունը զբաղվում է տեղեկատվական անվտանգության խնդիրնեփրին վերաբերող ինֆորմացիաների հավաքմամբ և վերլուծությամբ։ Ընկերությունը չի հայտնել իր հաճախորդների մասին տվյալներ, սակայն հայտնել է, որ «Stratfor»–ի ծառայություններից օգտվում են՝ ինչպես ամերիկյան խոշոր մասնավոր ընկերություններ, այնպես էլ պետական գործակալություններ։

Հենրի Քիսինջերը 1973–1977 թթ. եղել է ԱՄՆ պետքարտուղար, իսկ 1969–1975 թթ. ԱՄՆ–ի նախագահի ազգային անվտանգության հարցերով խորհրդականը։ 1973 թ–ին Քիսինջերը պարգեւատրվել է Խաղաղության Նոբելյան մրցանակի, Վիետնամում զինադադարի հետ կապված։ Դեն Կուեյլան 1989–1993 թթ. նախագահ Ջորջ Բուշ ավագի ժամանակ եղել է ԱՄՆ–ի փոխնախագահը։