Արևմուտքի՝ 21-օրյա հրադադարի պահանջի ֆոնին՝ Նեթանյահուն կարգադրել է թուլացնել Լիբանանի ուղղությամբ հարվածները

Իսրայելի վարչապետ Բնեիամին Նեթանյահուն բանակին կարգադրել է թուլացնել Լիբանանի ուղղությամբ հարվածները, փոխանցում է Channel 12-ը:

Նշվում է, որ Նեթանյահուի որոշումը պայմանավորված է միասնական Արևմուտքի՝ իսրայելալիբանանյան սահմանին 21-օրյա հրադադարի պահանջով։

Ինչպես հայտնել ենք, ԱՄՆ-ն, Ֆրանսիան և այլ դաշնակից երկրներ համատեղ հայտարարություն են տարածել՝ կոչ են անում անհապաղ 21-օրյա հրադադար հաստատել Իսրայելի և լիբանանյան «Հեզբոլլաբ» շարժման միջև։

«Իրավիճակը Լիբանանի և Իսրայելի միջև 2023 թվականի հոկտեմբերի 8-ից ի վեր տարածաշրջանային էսկալացիայի անընդունելի վտանգ է ներկայացնում: Սա ոչ մեկի շահերից չի բխում՝ ո՛չ Իսրայելի, ո՛չ էլ Լիբանանի: Ժամանակն է՝ հասնելու դիվանագիտական կարգավորման, որը թույլ կտա սահմանի երկու կողմի խաղաղ բնակիչներին ապահով վերադառնալ իրենց տները։

Կոչ ենք անում անհապաղ 21-օրյա հրադադար հաստատել Լիբանան-Իսրայել սահմանին, որպեսզի հնարավոր լինի դիվանագիտական կարգավորման հասնել: Մենք կոչ ենք անում բոլոր կողմերին՝ ներառյալ Իսրայելի և Լիբանանի կառավարություններին, անհապաղ հաստատել ժամանակավոր հրադադար և իրական հնարավորություն տալ դիվանագիտական կարգավորմանը: Մենք պատրաստ ենք լիովին աջակցել այս ժամանակահատվածում Լիբանանի և Իսրայելի միջև համաձայնագիր կնքելու բոլոր դիվանագիտական ջանքերին՝ հիմնվելով վերջին ամիսների ջանքերի վրա, որոնք վերջ կդնեն այս ճգնաժամին», - ասվում է հայտարարութան մեջ: