Վրաստանի կրթության, գիտության եւ երիտասարդության նախարարը հրաժարական է տվել

Վրաստանի կրթության, գիտության եւ երիտասարդության նախարար Գեորգի Ամիլախվարին հրաժարական է տվել, տեղեկացրել է NewsGeorgia-ն։

Սկզբում այդ մասին տեղեկացրել է Վրաստանի կառավարության մամուլի ծառայությունը։ Վարչապետ Իրակլի Կոբախիձեն նախարարի հրաժարականն անվանել է «մեծ կորուստ կառավարող թիմի համար»։

Նրա կարծիքով՝ մեկուկես տարում Ամիլախվարիի օրոք կրթության նախարարությունում տեղի են ունեցել «բազմաթիվ փոփոխություններ»։

Ամիլախվարին ինքը տեղեկացրել է, որ վերադառնում է բիզնես, բայց եւ կմնա Բիձինա Իվանիշվիլու գլխավորած քաղաքական թիմի «շարքային զինվոր»։ Նրա խոսքով՝ նախագահական ընտրություններից մեկ ամիս առաջ հեռանալով պաշտոնից՝ նա «հնարավորություն է տալիս նոր նախարարին մտնել նախարարություն եւ գլխավորել համակարգը»։

Շաբաթ օրվա ճեպազրույցում արդեն նախկին նախարարը հայտնել է, որ չորս տարում «Վրացական երազանքը» հանդիպել է բազմաթիվ արժանավոր մարդկանց, բայց քաղաքականության հարցում հիասթափվել է։

40-ամյա Գեորգի Ամիլախվարին կրթության նախարարի պաշտոնը զբաղեցրել է 2023թ. մարտից։ Մինչ այդ նա Վրաստանի խորհրդարանի կրթության եւ գիտության կոմիտեի նախագահն էր։

ԶԼՄ-ում Ամիլախվարիի հրաժարականի մասին լուրերն արծարծվում էին արդեն երկար ժամանակ։ Հավաստիացվում էր, որ հարցը լուծվել է այս գարնանը, մասշտաբային ուսանողական գործադուլներից  հետո, երբ պահանջվում էր հետ կանչել օտարերկրյա գործակալների մասին օրենքը։ Այդ ժամանակ բողոքի էին դուրս եկել մասնավոր եւ պետական բուհերի ուսանողները եւ դասախոսները ողջ Վրաստանում։